“Цаг хугацаа хамгийн үнэнч, шударга шүүгч. Би эцсийн мөч хүртлээ Монголын ардчиллын төлөө явна”

АН-аас ерөнхийлөгчийн сонгуульд нэр дэвшсэн С.Эрдэнэ мэдээлэл хийж байна.

Тэрбээр ” Нийгэм эдийн засгийн хүнд нөхцөлд манай улс байна. Сонгуулийн үеэр олон будлиан гарсан. Мөнгө тараасан гэдгийг та бүхэн мэднэ. Хууль хүчний байгууллагууд эдгээрийг шалгана байх. Нотлох баримт олон бий. Нэгэнт болоод өнгөрсөн юм чинь гэж үүнийг орхигдуулж болохгүй.

Олон жил улс төрийн тогоонд бие биедээ хатуу, ширүүн үг хэлж, хамт явсан хүний хувьд Монгол төрийн үйл хэрэг, Монголын ард түмний эрх ашиг гэдэг чухал зүйлийг бид хэн нь ч орхиж, огоорч болохгүй. Гэхдээ би СЕХ-ны дүн мэдээг хүлээн авч, дараагийн ажилд сайн сайхан, амжилтыг хүсье. У.Хүрэлсүх танийг Монголын ард түмний өмнө амласан амлалтаа биелүүлж чадна гэдэгт нь итгэж байна. Улс төр өөрөө цэвэр байх, төрийн бүх шатны сонгууль хуулийн дагуу явагддаг байх байдал руу бид хамтдаа шилжих ёстой.

Надад саналаа өгсөн, итгэл үзүүлж, эцсийн мөч хүртэл надтай хамт байсан эрхэм журмын нөхөд, иргэд сонгогчиддоо гүн талархлаа илэрхийлье. Би эцсийн мөч хүртлээ Монгол Улсын тусгаар тогтнол, ардчиллын үнэт зүйлийг хамгаалахын төлөө явах болно оо. Дарангуйлалгүй төр, дарангуйлалгүй Монгол Улс оршин тогтноно оо гэдэгт итгэж байна.

Миний улс төрийн замнал, карьер дуусаагүй. Дуусаасай гэж хүсдэг хүмүүүс бий. Би тэдний хүслийг биелүүлэхгүй. АН-ыг хагаралтай, хуваагдсан мэтээр ойлгуулдаг. Манай намд ийм зүйл байхгүй. Улсын дээд шүүхийн бүх гишүүдийн бүрэлдэхүүнтэй хуралдаж, улс төрийн намын даргын асуудлыг шийддэг хуультай болсон. Иймд хуралдааны тов хэзээ гарахыг би мэдэхгүй байна.

Үеийн үед Ардчилсан нам унаж, босож л ирсэн. Дандаа босоо юм уу эсвэл унаж яваагүй. Унах болгондоо улам ухаажиж, хүрээгээ тэлж, дараа дараагийнхаа улс төрийн үйл ажиллагаанд оролцож ирсэн түүхтэй. Өнөөдөр ялагдлаа гээд үйл ажиллагаагаа зогсоодог ч юм уу, идэвхгүй байдалд шилжинэ гэж би бодохгүй байна. Манай шинэ сонгогдсон дарга нар нилээн эрч хүчтэй, боломжтой хүмүүс гарч ирсэн. Тэгэхээр илүү чадварлаг ажиллах байх гэж найдаж байна.

Өнөөдөр би үзэл санаа, үнэт зүйлийнхээ төлөө зогссон. Сонгууль ямар луйвартай, ямар зохион байгуулалттай үүнд ямар хүчин зүйл нөлөөлсөн бэ гэдэг асуудал өнөөдөр ярьчихдаг асуудал биш. Цаг хугацаа хамгийн үнэнч, шударга шүүгч. Зарим нэг сэтгүүлчиддээ захиж хэлэхэд аль нэг улс төрийн хүчний захиалгаар янз бүрийн асуудал ярьдгаа больчихвол зүгээр байна шүү. Шударга ёсны төлөө, дөрөв дэх засаглалынхаа үүргийг амжилттай хүлээгээрэй гэж хүсье. Баярлалаа” гэв.