Маргааш худалдаа, үйлчилгээний байгууллагууд ажиллахгүй

Монгол Улсын Ерөнхийлөгчийн найм дахь сонгуулийн санал хураалт маргааш орон даяар 07.00-22.00 цагийн хооронд явагдана. Сонгуультай холбоотойгоор дараах үйл ажиллагаа явуулахыг хориглоно.

Монгол Улсын Ерөнхийлөгчийн сонгуулийн тухай хуулийн: 
67.1.Санал авах өдөр дараах үйл ажиллагааг хориглох бөгөөд аймаг, нийслэлийн Засаг дарга холбогдох шийдвэр гарган хяналт тавьж ажиллана:

67.1.1.согтууруулах ундаагаар үйлчлэх, худалдах

67.1.2.соёл урлаг, үзвэр, спортын зэрэг олныг хамарсан аливаа арга хэмжээг зохион байгуулах

67.1.3.гадаа болон битүү талбайд үйл ажиллагаа явуулдаг худалдаа, үйлчилгээний төв ажиллах-ыг хориглоно гэж заажээ. 

Энэ хуулийн дагуу сонгуулийн санал хураах өдөр худалдаа, үйлчилгээний төв ажиллахгүй. Мөн зургаадугаар сарын 8-наас 10-ны өдрийг дуустал архи, согтууруулах ундаа худалдах, түүгээр үйлчлэхийг түр хориглох захирамжийг Улаанбаатар хотын Засаг дарга Д.Сумъяабазар гаргажээ. Санал хураах өдөр нийслэлд автомашины дугаарын хязгаарлалт үйлчлэхгүй юм.