Э.Тэмүүлэн: 14 хоногийн дараа өдөрт 400 хүртэл халдвар илрэх магадлалтай

УОК-ын дарга, Шадар сайд С.Амарсайхан Халдварт өвчин судлалын үндэсний төвд ажиллах үеэр тус төвийн халдварт өвчний тандалт, сэргийлэлт эрхэлсэн дэд захирал Э.Тэмүүлэн халдварын нөхцөл байдлыг танилцууллаа.

Тэрбээр “Гурван эмнэлэг рүү бүх батлагдсан тохиолдлуудаа хуваарилснаар халдварыг цааш нь тархаахгүй болгож байгаа. Ингээд ойрын хавьтлуудыг тодорхойлох ажлыг явуулдаг. Судалгааны үр дүнд нийт хавьтлуудын 90-ээс дээш хувийг олдог.

Олсон хавьтлуудаа 14 хоног тусгаарладаг. ХӨСҮТ-ийн хувьд ямар ч өвчлөлгүй үед бэлэн байдлаа хангаж байсан. Тохиолдлын тоо ихсээд, хүн амын дунд өргөн тархалт үүссэн үед тандалтын хариу арга хэмжээ өөрчлөгддөг. Энэ үед батлагдсан тохиолдлуудаа хөнгөн бол гэрт нь тусгаарлах гэх мэт арга хэмжээ авч байна. Сүүлийн долоо хоногийн нөхцөл байдлаас харахад хүн амын дундах халдварын өргөн тархалт руу орж байгаа нь санаа зовоож байна.

Улаанбаатар хотод дөрөвдүгээр үе шат буюу хүн амын дунд халдвар өргөн тархсан үе байна.
Халдварын шатны үнэлгээг долоо хоног бүр хийж байна. Улаанбаатар хотод дөрөвдүгээр үе шат буюу хүн амын дунд халдвар өргөн тархсан үе байна. Харин Завхан, Төв аймаг хоёрдугаар үе шатанд байгаа.

Бүртгэгдсэн 81 кластер байна. Үүнээс 21 нь хянагдаж дууссан. Одоогийн байдлаар 41 идэвхтэй кластер байна. Халдвар зөвхөн орон зайгаар хязгаарлагдахгүй. Драмын театртай холбоотой кластер олон хүнийг хамруулж, 450 ойрын хавьтал бүртгэгдээд байна. 14 хоногийн дараа өдөрт 150-400 хүртэл халдвар гарах магадлал 50 хувьтай байна. Илүү цаг, ажлын ачаалал зэрэг нийгмийн асуудал ХӨСҮТ-ийн ажилчдад тулгамдаж байна” хэмээв.