Монголчууд нь “танихгүй” ч мундагууддаа танил Гадаад харилцааны сайд

Эх орноосоо хулгай хийдэггүй Засгийн газар, Улсын их хурал бүрдүүлнэ гэж омогдож байсан Ерөнхий сайд У.Хүрэлсүхийн Засгийн газарт “ногоон гэрэл”-ээр орж ирж, Гадаад харилцааны сайдын сунгааг будилаантуулсан хүн бол Н.Энхтайван байв.

МАН-ын Удирдах зөвлөлд Ерөнхий сайд У.Хүрэлсүхийн оруулж ирсэн сайд нарыг 100 хувь дэмжсэнээр Монгол Улсын гадаад харилцааг зангидах том босгыг алхсан Н.Энхсайхан улс төрчийнхөө хувьд “битүү морь”. Тэр 60 тэрбумын бүлэглэлд ч байсан бас байгаагүй, тэр У.Хүрэлсүхийн сүүлд бүтээсэн бүлэглэлд байгаагүй, одоо байгаа… ийм л хүн. Өөрөөр хэлбэл Н.Энхтайваныг ард иргэд дотор таних хүн цөөхөн ч “халаасны улс төр” дотор хамгаас дээр гэрэлтдэг “од” болж чадсан нэгэн гэж хэлж болно. Тэр цагаа олж гэрэлтэж, тэр бас цагаа олж намын даргын нүдэнд өртөж, сайд хэмээх өндөр албанд томилогдсон.

Энэ ч утгаараа тэр өнөөдөр ОХУ-д айлчилж байгаа. Дэлхий нийтийг сандраасан гоц халдварт өвчний аюул занал ихтэй энэ цаг мөчид манай улс ганцаараа дотооддоо аймшигт өвчин алдаагүй улс болсон. Тэр ч утгаараа хилийн хаалга үүд хэдэн давхар манаатай, тэр хэрээр жирийн иргэд нь харийн нутагт эх орондоо ирэх гэж жагсаж тэмцэж буй. Харин энэ бүх хилийн хоригийг “үл анзаарсан” эрхэм сайдтан ирэх өдрүүдэд гадаад харилцаагаа тэлж, албан айлчлал хийж байгаа нь бас нэгэн гайхамшиг бүтээж буй гэхэд хэтрүүлсэн, ёжилсон зүйл болохгүй биз ээ.

Гадаад харилцааны сайдын ажил эрхлэлт, боловсролыг мэдээж манай уншигчид сонирхож буй байх. Сануулахад, Гадаад харилцааны сайд Н.Энхтайван УИХ дахь МАН-ын бүлгийн ажлын албаны даргаар ажилладаг, давхар дээлтэй нэгэн. 2016 оны сонгуульд МАН олонхи болоход бүлгийн ажлын албаны даргаар томилогдож байсан бөгөөд Гадаад харилцааны яаманд олон жил ажилласан гэнэ. 1993 онд Худалдаа үйлдвэрийн яаманд мэргэжилтнээр ажлын гараагаа эхлүүлж, Гадаад харилцааны яаманд мэргэжилтэн, Атташегаар үүрэгт ажлаа үргэлжлүүлсэн түүнийг мөн яамны Монгол, Хятадын Засгийн газар хоорондын Комиссын газарт Хариуцлагатай нарийн бичгийн даргаар хоёр жил ажилласаныг намтараас нь харж болно. 1999 оноос Монгол Улсаас БНХАУ-д суугаа ЭСЯ-д  Худалдаа, эдийн засгийн асуудал хариуцсан атташе, 3, 2, 1-р нарийн бичгийн дарга, 2003 оноос Газрын тосны газар Хэрэг эрхлэх газрын дэд дарга, 2006 оноос Төрийн өмчийн хорооны Тамгын газарт Дарга бөгөөд дэд дарга, 200 онд эргээд Монгол Улсаас БНХАУ-д суугаа ЭСЯ-д  Худалдаа, эдийн засгийн зөвлөх,   2008-2011 онд Гадаад харилцааны яамны Гадаад худалдаа, эдийн засгийн хамтын ажиллагааны газрын захирлаар ажиллаж байсан тэрбээр 2012 онд Монголын Худалдаа, эдийн засгийн хөгжлийг дэмжих нийгэмлэгийн Тэргүүн, “Эрдэнэтийн хөгжил бидний зүтгэл” ТББ-ын тэргүүнээр ажиллаж байгаад Гадаад харилцааны сайдад томилогдсон байна.

Эрдэнэтэд дунд сургуулиа дүүргэж, Политехникийн дээд сургуулиар дээд боловсролтой болсон тэрбээр Бээжин хотын Худалдааны их сургууль, Шинэ Зеланд, Велингтоны их сургууль Дипломатын дээд курс , МУИС, АНУ-ын Стрэйерийн их сургуулиар их сургуулийн боловсролоо баталгаажуулсан байна.