Европын улсууд нэг өдрийн дотор хамгийн олон иргэнээ коронавирусийн өвчлөлөөр алдлаа

Итали улсад нийт 368 өвчтөн Covid-19 халдварын улмаас нас барж, нийт эндэгдлийн тоо нь 1,809 хүрсэн байна. Испани улсад 97 хүн нас барж, нийт 288 эндэгдэлтэй болсон бол Франц улсад 29 эндэгдэл нэмэгдэж, нийт 120 хүн коронавирусийн халдвараар амиа алджээ.

Дээрх гурван улс нэг өдрийн дотор хамгийн олон иргэнээ Covid-19 вирусийн өвчлөлөөр алдсан нь энэ юм.

Их Британи улсын хувьд өчигдөр мөн вирусийн дэгдэлт эхэлснээс хойш хамгийн муу өдөр болж, 14 өвчтөн нас барж, нийт эндэгдэл нь 36 хүрсэн байна.

Герман улс Даваа гарагийн өглөөнөөс эхлэн Франц, Швейцарь, Австри, Дани, Люксембург улсуудтай залгаа хилийн хяналтаа чангатгах шийдвэр гаргасан юм.

Португаль улс мөн цорын ганц хөрш Испани улстай залгаа хилийн хяналтаа өндөржүүлэх арга хэмжээ авахаар болжээ.

Чех улс зөвхөн ажилдаа явах, хүнсний бараа цуглуулах, төрөл төрөгсдөдөө зочлох онцгой шаардлагатай тохиолдлоос бусад үед иргэдийнхээ хөдөлгөөнийг бүрэн хориглосон байна. Уг хориг Ням гарагийн шөнөөс эхлэн гуравдугаар сарын 24 хүртэл үргэлжлэх гэнэ.

Австри улсад өнөөдрөөс эхлэн таваас дээш тооны хүн нэг дор цугларахыг хоригложээ. Ирланд улс баар, уушийн газруудаа гуравдугаар сарын 29 хүртэл хаасан байна.

Европын олон орон Covid-19 дэгдэлтийг хязгаарлахын тулд сургуулиудаа түр хугацаагаар хаажээ. Дэлхийн Эрүүл Мэндийн Байгууллага саяхан Европ тивийг коронавирусийн дэгдэлтийн шинэ төв болсныг зарласан юм.

Эх сурвалж: BBC