Төрийн албаны хуулийн 3.1.4 ийн дагуу гадаадад зорчихдоо казино тогловол чөлөөлнө

Тэрбээр, “Засгийн газрын хуралдаанаар Төрийн бүх шатны албан тушаалтны ёсзүйн дүрэмд “Дотоод гадаадад мөрийтэй тоглох /казино тоглохгүй байх/, энэ төрлийн үйлчилгээний газраар үйлчлүүлэхгүй байх гэсэн заалтыг нэмж оруулсан. Сүүлийн 10 гаруй жил албан тушаалтнууд мөрийтэй тоглох асуудал хавтгайрч, казино тоглох замаар мөнгө угаах, авлига, хээл хахууль авах, нөлөөлөлд автах нөхцөл байдалд Монгол төрийн албан хаагчид, тэр дундаа төрийн өмчит ААН-ийн дарга, захирлууд олноор холбогдох болсон. Төрийн зарим албан хаагчдын цалин амьдралдаа хүрэхгүй гадаадад ажиллаж байхад төрийн өндөр дээд албан тушаалтнууд казино тоглож байгаа тоогоор тэргүүлэх хэмжээний статистик гарч, нийгмийн сүлжээ болон дэлхийн хэвлэл мэдээллийн байгууллагуудаар гарах боллоо.

ЗГ-ын энэ шийдвэрийн биелэлтийг улирал тутамд дүгнэж ажиллахыг холбогдох албан тушаалтнуудад үүрэг болгосон. Тиймээс аль нэг газар төрийн албан тушаалтнууд, тэр дундаа удирдах албан тушаалтнууд казино тоглож байгааг мэдвэл шууд ЗГХЭГ-т мэдээлэл өгч болно. Мөрийтэй тоглосон нь батлагдсан тохиолдолд ёсзүйн дүрэмд зааснаар албан тушаалаас нь чөлөөлөх хүртэл арга хэмжээ авна” хэмээн мэдэгдэж байжээ.

Төрийн албаны тухай хуулийн 40.2-г үндэслэж Засгийн газраас Төрийн бүх шатны албан тушаалтны ёс зүйн дүрэмд өөрчлөлт оруулсан. Үүнд, Төрийн захиргааны болон үйлчилгээний албан хаагчийн ёс зүйн дүрмийн гурав дахь хэсгийн 3.1.4.в, 3.1.4.г дэх дэд заалтуудыг нэмсэн. Тус заалтуудыг дурдвал:

• 3.1.4.в. гадаад улсад албан томилолтоор ажиллах хугацаандаа дипломат ёс жаягийг чанд баримталж, Монгол Улсын нэр хүндэд харшилсан аливаа үйлдэл гаргахгүй байх; (Энэ дэд заалтыг Засгийн газрын 2019 оны 122 дугаар тогтоолоор нэмсэн)
• 3.1.4.г. гадаадад зорчихдоо мөрийтэй тоглоом (казино) тоглож, энэ төрлийн үйлчилгээний газраар үйлчлүүлэхгүй байх; (Энэ дэд заалтыг Засгийн газрын 2019 оны 122 дугаар тогтоолоор нэмсэн)

“Л.Оюун-Эрдэнэ: Аль нэг газар төрийн албан тушаалтнууд, тэр дундаа удирдах албан тушаалтнууд казино тоглож байгааг мэдвэл шууд ЗГХЭГ-т мэдээлэл өгч болно. Мөрийтэй тоглосон нь батлагдсан тохиолдолд ёсзүйн дүрэмд зааснаар албан тушаалаас нь чөлөөлөх хүртэл арга хэмжээ авна”

ЗГХЭГ-ын дарга Л.Оюун-Эрдэнийн мэдэгдсэнээр дээрх дэд заалтуудыг зөрчсөн болон удирдах албан тушаалтнууд казино тоглосон нь батлагдсан тохиолдолд албан тушаалаас нь чөлөөлөх хүртэл арга хэмжээ авахаар болсон нь энэ сарын 17-18 нд Австрали улсын Сидней хотод казино тоглосон нь нотлогдсон МАН-ын бүлгийн дарга Д.Тогтохсүрэн нарыг албан тушаалаас нь чөлөөлөх хангалттай үндэслэл болохыг харуулж байна.