Эсэргүүцсэн ч дэмжсэн улс төрийн намын өөрчлөлт

Энэ тухайгаа УИХ-ын гишүүн Д.Хаянхярваа “Нам улсын хэмжээнд үйл ажиллагаа явуулна гэснийг дэмжихгүй байгаа. 365 суманд 365 нам байгуулагдах нөхцөл бүрдэнэ. Нам төрийн ажил ойртож байгааг шүүмжлэх болсон. Энэ талаас нь харвал уг заалтыг дэмжих боломжгүй” гэсэн бол УИХ-ын гишүүн Ж.Мөнхбат “Үндсэн хуульд нэмэлт, өөрчлөлт оруулах нь үндэсний зөвшилцлийн асуудал. Улс төрийн намтай холбоотой асуудалд бид сайн бодох хэрэгтэй. Янз бүрийн заалт оруулж ирж бужигнуулах хэрэг байна уу, хүссэн, эс хүссэн Монгол Улс нам төвтэй улс болох алхам руу орох заалтыг оруулаад ирлээ” гэсэн юм.

Ингэснээр чуулган завсарлаж, олонхийн нам саналаа нэгтгэхээр  хуралдсан. Түүний дараагаар үдээс хойшхи хуралдаан үргэлжилж, Төрийн байгуулалтын байнгын хороо дэмжсэн төслийн уг заалтыг дэмжье гэсэн саналын томьёоллоор санал хураахад, хуралдаанд оролцсон гишүүдийн олонх дэмжсэн юм. Ийнхүү эсэргүүцсэн ч эцэст нь улс төрийн нам улсын хэмжээнд үйл ажиллагаа явуулах гэснийг дэмжсэн юм.

Үргэлжлүүлэн төслийн заалт дахь “Намын дотоод зохион байгуулалт нь ардчилсан зарчимд нийцсэн хөрөнгө оруулалтын эх сурвалж болон зарцуулалт нийтэд ил тод байна. Намын зохион байгуулалт  үйл ажиллагааны санхүүжилт ил тод байдал төрөөс санхүүгийн дэмжлэг үзүүлэх байдлыг хуулиар тогтооно” гэсэн төслийн заалтыг хэлэлцэж, гишүүд дэмжсэн юм.

Энэ тухай МУИС-ийн Хууль зүйн сургуулийн дактор, профессор, Ажлын дэд хэсгийн гишүүн О.Мөнхсайхан “Намд зохион байгуулалтын хувьд ардчилсан байх, хөрөнгө, орлогын эх үүсвэр, зарцуулалтаа ил тод байлгах үүрэг хүлээлгэсэн чухал заалт (19.3) дэмжигдлээ. Ингэснээр УИХ-ын хоёр бүрэлдэхүүн дамжаад ч явж чадахгүй байгаа намын шинэчлэл хийгдэнэ. Энэ үүргийг хүлээлгэсэн хууль заавал гаргах ёстой. Үгүй бол Цэц дээр очно. Намгүйгээр ардчилал байх боломжгүй тул энэ мэт зөв зарчмын дагуу бэхжүүлэх хэрэгтэй. Үүнд түлхэц болох чухал заалт. Олон орны ардчилсан Үндсэн хуульд байдаг заалт юм” гэлээ.