Монгол Улсын Засгийн газрын 2024 оны 181 дүгээр тогтоолоор батлагдсан “Монгол Улсын хууль тогтоомжийг 2028 он хүртэл боловсронгуй болгох үндсэн чиглэл”-ийн 74-т “Улсын нисэхийн тухай хуульд нэмэлт, өөрчлөлт оруулах тухай” хуулийн төслийг боловсруулж, 2025 онд хуулийн төслийг Улсын Их Хуралд өргөн мэдүүлэх гэж заасныг хэрэгжүүлэх ажлын хүрээнд “Улсын нисэхийн тухай хууль /шинэчилсэн найруулга/-ийн төслийн боловсруулан холбогдох хууль эрх зүйн хүрээнд төслийн бүрдүүлбэрийг ханган ажиллаж байна.
Дээрх ажлын хүрээнд хууль, тогтоомжийн тухай хуулийн 8 дугаар зүйлийн 8.1.5 дахь заалт, 38 дугаар зүйлийн 38.1 дэх хэсэг, 38.6.2 дахь заалтуудыг үндэслэн Батлан хамгаалахын сайдын тушаалаар томилогдсон ажлын хэсэг, яамны СБТГ-ын Улсын нисэхийн хэлтэс, ТЗУГ-тай хамтран тус хуулийн үйлчлэлд хамаарах байгууллагуудын төлөөлөлтэй хуулийн төслийн хэлэлцүүлгийг 2025 оны 07 дугаар сарын 31-ний өдөр зохион байгууллаа.
Тус хэлэлцүүлэгт улсын агаарын хөлгийг эзэмшигч байгууллагууд /Зэвсэгт хүчний Агаарын цэргийн командлал, нисэхийн ангиуд, ХХЕГ, Хилийн цэргийн нисэх алба, Онцгой байдлын ерөнхий газар, түүний харьяа нисэхийн анги/-ын удирдлага, төлөөллүүд оролцож Улсын нисэхийн тухай хуулийн шинэчилсэн найруулгын төсөлд тэдний үйл ажиллагаа, эрх ашигтай нь нийцсэн ач холбогдолтой санал, санаачилгуудыг дэвшүүлж, үр дүнтэй хэлэлцүүлэг боллоо.
Цаашид ажлын хэсэг хэлэлцүүлгээс гарсан зарим санал, зөвлөмжүүдийг хуулийн төсөлд тусгаж, төслийг эцэслэн боловсруулахаар тогтлоо.
