Н.Өнөрцэцэг: Айж уйлаад яахав дээ, гэмт хэрэг хийгээгүй учраас үүндээ л найдаж байна

Сэтгүүлч Н.Өнөрцэцэгт холбогдох шүүх хурал Баянзүрх , Сүхбаатар, Чингэлтэй, дүүргийн эрүүгийн  хэргийн анхан шатны шүүхийн танхимд  өнөөдөр болж байгаа юм.  Шүүх хурал эхлэхээс өмнө бид түүнээс зарим тодруулгыг авсан юм.

–Ямар зүйл ангиар яллаж байгаа вэ. Процессийн талаар тодруулахгүй юу?

-Намайг татвар төлөхөөс зайлсхийсэн, шүүхийн нэр төрд халдсан, төрийн нууц мэдээлэл хадгалсан гэдэг Эрүүгийн дөрвөн зүйл ангиар яллахаар прокуророос шүүх рүү шилжүүлсэн. Бид шүүхэд олон асуудлыг эргэж тодруулъя. Маш олон эргэлзээтэй асуудал үүссэн. Би өөрөө ч ойлгохгүй байгаа Эрүүгийн хуулийн  19.11 буюу төрийн нууц мэдээллийг хадгалсан гэж намайг буруутгаж байгаа юм. Хадгалсан хүн байгаа бол задруулсан хүн байгаа. Тэгвэл задруулсан гэмт хэрэгтэн нь хэн юм. Хэн надад төрийн нууцыг өгсөн юм. Би сайдын нэр сонссон. Тэр хүн нь хэн юм. Ямар зорилготой манай сайтад өгсөн юм. Яагаад төрийн нууц миний машинаас гэрээс, ажлаас олдоогүй байхад яагаад намайг холбогдуулаад байгаа юм.

-Шүүх хурлыг нээлттэй явуулах хүсэлт тавьсан шүү дээ?

-Би шударга үнэнээр нь шүүлгээд өнгөрье. Олон нийт ард түмэн ч мэдэх эрхтэй. Шантаажчин гэж олон хүн чичилдэг. Ард түмэн одоо л харах хэрэгтэй. Өнгөрсөн  10 жилийн хугацаан дахь бүх гүйлгээг шалгасан. Тиймээс би ард түмэнд ил тод юунд буруудаад байгаагаа харуулмаар байна.

Зариг сайт долоон жилийн хугацаанд 400 орчим сая төгрөгийн татвар төлсөн байна. Бантсандаа шалгаад байх биш нотолгоонд суурилж шалгах хэрэгтэй. Эрүүгийн хуулийн бусдыг айлган сүрдүүлэх замаар бусдаас их хэмжээний мөнгө авах юм бол 2-8 жил хорих ялтай юм билээ. Ийм хэргээр шалгаж эхлээд яллагдагчаар татсан тогтоолоо хүчингүй болгосон. Мөн намайг тэрбум төгрөгийн татвараас зайлсхийсэн гэж барьж хорьсон. Гэхдээ эдийн засгийн шинжээчийн дүгнэлтээр шал өөр дүн гарсан л даа. 

-Хүсэлтээ шүүхэд бичгээр өгсөн үү?

-Өгсөн. Одоо хэлэлцэнэ. Миний хамгийн сүүлийн найдвар бол шүүх л байна. Өнгөрсөн долоон жилийн хугацаанд зөндөө болохгүйтэй тэмцлээ. Тагнуул, АТГ, цагдаа гээд бүхэл бүтэн аппарат миний эсрэг ажиллаж байна. Нотлох баримт дээр тулгуурлаад  шийдвэрээ гаргаасай.

-Айж байна уу?

-Үхэхээс бусдыг үзлээ. Баригдаад, ачигдаад хэцүү нөхцөлд 68 хоног хоригдлоо. Гэрийн хорионд дөрвөн сар байлаа. Гэхдээ хэний өмнөөс бас ажилласан юм. Ялархаад яахав дээ. Айгаад уйлаад яахав дээ. Туулаад л гарна. Би өөртөө л итгэж байна. Гэмт хэрэг хийгээгүй учраас үүндээ л найдаж байна. Айж байгаа ч итгэл маань тасраагүй дундраагүй байна.