Малчид нийт 1.2 их наяд төгрөгийн хэрэглээний зээл авчээ

Энэ жил олон аймагт цас их орж, зуд болов. Нийт 3.8 сая мал хорогдсон нь өмнөх жилүүдийнхээс хэд дахин их байна. Иймд малчдын зээлийн эргэн төлөлтийг хойшлуулах болсон. Харин зарим малчин зээлээ тэглүүлэх хүсэлтээ илэрхийллээ.

Малчид нийт хэчнээн төгрөгийн зээл авсан талаар тодруулав. Банк, санхүүгийн академийн эдийн засагч Ч.Сосорбарам “Малчид нийт 1.6 их наяд төгрөгийн зээлийг арилжааны банкуудаас авчээ. Үүний 300 гаруй тэрбум төгрөгийн зээлийг бизнесийн, 1.2 их наяд төгрөгийн зээлийг хэрэглээний зориулалтаар авчээ. Бизнзесийн зээлийг малчдын байгуулсан нөхөрлөл, хоршоонд хашаа саравч барих, эрчимжүүлсэн мал аж ахуй эрхлэхэд дэмжлэг үзүүлэх зорилгоор олгожээ.   

Харин хэрэглээний зээлийг олон зорилгоор авдаг. Энэ зээлийг оюутны төлбөр төлөхөд, худаг ус гаргахад зарцуулсан уу гэдгийг нарийн мэдэх боломжгүй байна. Иймд малчдын зээлийг тэглэх, эсвэл хугацааг нь хойшлуулах гэхээс илүү юуны өмнө тэдний зээлийн зарцуулалтыг ангилах хэрэгтэй. Энэ жилийн зудын аюул манай улсад даатгалын тогтолцоо сул хөгжсөнийг дахин харууллаа.

Малчдад олгосон 1.6 их наяд төгрөг нь төрийн мөнгө биш, Засгийн газрын мөнгө биш. Арилжааны банканд мөнгөө хадгалуулсан хадгаламж эзэмшигчдийн хөрөнгө юм.” гэв.

Малчдын авсан нийт зээлийн 2-3 хувь нь чанаргүй зээл байна. Энэ нь ААН-үүдийн чанаргүй зээлийн хувьтай харьцуулахад бага дүн юм. Малчид зээл авахдаа малаа барьцаа болгодог. Гэвч мал нь хорогдож, зээлээ төлөх чадваргүй болбол тухайн зээлийг олгосон банк хохирно.