Баянзүрх дүүргийн 26 дугаар хороо Дүнжингарав худалдааны төвийн урд зам дээр газ ачиж явсан ачааны автомашин осолдож ихээхэн хэмжээний дэлбэрэлт үүссэн.
Дэлбэрэлтэд онцгой байдлын гурван алба хаагч амиа алдаж, 17 өрхийн 41 том хүн, 23 хүүхдийг гэрээс нь нүүлгэн шилжүүлсэн бол 14 хүн эмнэлэгт хүргэгдээд байгаа юм. Мөн хамгийн сүүлийн үеийн мэдээллээр 30 машин галд шатжээ.
Тэгвэл Улсын онцгой комисс 14.00 цагт дээрх асуудлаар хуралдах бөгөөд хуралдааны дараа мэдээлэл хийх юм байна.
Одоогоор иргэдийг нүүлгэн шилжүүлсэн буудалд түр штаб гарган ажиллаж иргэдийг хоол хүнс, хувцсаар хангахаас гадна сэтгэлзүйн тусламж үзүүлж байгаа аж. Харин дэлбэрэлтэд өртөж эрүүл мэнд, эд хөрөнгөөрөө хохирсон иргэдийн хохирлыг хэрхэн барагдуулах, ямар арга хэмжээ авах нь одоо ч тодорхойгүй байна.
Өнөөдөр Засгийн газрын ээлжит хуралдаантай байсан ч хойшлуулж, маргааш хуралдуулахаар болсон. Тиймээс УОК хуралдаж, гаргасан шийдвэрээ Засгийн газрын хуралдаанд оруулж, хэлэлцүүлнэ. Өөрөөр хэлбэл, ами алдсан алба хаагчид болон эрүүл мэнд, эд хөрөнгөөрөө хохирсон иргэдийн асуудлаар УОК болон Засгийн газар шийдвэр гаргах юм.
+ There are no comments
Add yours