Эрүүл мэндийн салбарыг улстөрөөс ангид байлга

Төр, засгийн удирдлагууд монголчуудаа эрүүл байлгах гэж их л олон хөтөлбөр баталж, зорилт дэвшүүлдэг. Харамсалтай нь өнөөх нь ямар үр дүнд хүрснийг мэддэггүй. Зүгээр л бусдад таалагдахын тулд хийж буй арга хэмжээ учраас тэр. 

Уг нь түүнийхээ оронд эрүүл мэндийн салбарыг улстөржүүлэлгүй, тангараг өргөсөн эмч нартаа даатгаад үлдээчихвэл Монгол хүн эрүүл байхын төлөө хийж буй хамгийн зөв шийдвэр байх гээд байна. 

Хамгийн сүүлийн жишээ л гэхэд нийслэлийн дүүргүүдийн Эрүүл мэндийн төвүүдийн дарга нарын томилгоо байлаа. 

Хэдийгээр эмнэлгийн дарга нарын сонгон шалгаруулалтыг зарласан гэх авч тэнцсэн хүмүүс нь өнөөх л улсөрчдийн шахааныхан байгаа аж. 

Тодруулбал, сонгон шалгаруулалтад оролцож, өөрсдийн чадлаараа оноо авсан хүмүүс хоёр, гуравдугаарт эрэмбэлэгджээ. Тэдний өмнө буюу нэгдүгээр орсон хүн нь “том”-чуудын хамаарал, захианыхан бөгөөд анхнаасаа бараг л тэдэнд зориулсан шалгаруулалт зарласан бололтой. 

Товчхондоо хэн мөнгөтэй нь хөгжмөө захиалдаг гэдэгчлэн хэн улстөрийн татаастай байна тэр л Эрүүл мэндийн төвийн дарга болдог зарчим үйлчилж байна. 

Сайдын суудал нь улстөрийнх байж болох ч Эрүүл мэндийн төв болон шат, шатны эмнэлгүүдэд мэргэжлийн, мэргэшсэн эмч, мэргэжилтнүүд ажиллаж байж энэ салбар өндийж, үр бүтээлтэй ажиллах юм биш үү.