“Тавдугаар сарын сүүлээр иргэдийн машинд цахим гэрчилгээг наах ажил эхэлнэ”

Энэ оны гуравдугаар сарын 1-нээс бүх тээврийн хэрэгсэлд цахим гэрчилгээг үнэгүй олгохоор болж, RFID чип уншигчийг суурилуулах ажил эхлээд байгаа. Уг ажлын явцын талаар холбогдох албаныхнаас тодрууллаа.

Улаанбаатар хотын авто замын түгжрэлийг бууруулах нэгдсэн төсөл хэрэгжүүлэх нэгжийн захирал Ч.Батзориг “Тээврийн хэрэгслүүдийг цахим гэрчилгээжүүлэх ажил үргэлжилж байна. Энэ хүрээнд хатуу дэд бүтцийг бий болгосон. Тодруулбал, 161 байршилд RFID уншигчуудыг суурилуулж, программ хөгжүүлэлтийг бүрэн хийж дууссан.

Нийтийн тээврийн хэрэгсэл, төрийн байгууллагын автомашинуудад цахим гэрчилгээг олгож байна. Үүний дараа “UB Cab” такси үйлчилгээний 36,000 тээврийн хэрэгсэл, төвийн зургаа, алслагдсан гурван дүүргийн иргэдийн тээврийн хэрэгсэлд цахим гэрчилгээ олгох ажил эхэлнэ.

Наймдугаар сарын 1-н гэхэд Улаанбаатар хотын хэмжээнд дуусгахаар төлөвлөж байна. Есдүгээр сарын 1-нээс татвараа цахимаар төлдөг болно.

Орон нутгийн тээврийн хэрэгсэлд зургаадугаар сараас цахим гэрчилгээг олгож эхэлнэ.

Улсын хэмжээнд 1.2 сая тээврийн хэрэгсэл байдаг. Үүнээс эхний ээлжид нийслэлийн 447,000 тээврийн хэрэгслийг цахим гэрчилгээтэй болгох хийх ажилд гурван тэрбум төгрөгийг нийслэлийн төсвөөс гаргаж байгаа. Эдгээр цахим гэрчилгээг нийлүүлэх сонгон шалгаруулалтад “Бодь” групп шалгарсан”.

Тээврийн хэрэгслийн гэрчилгээг цахим болгох цогц ажилд нийт ₮13 тэрбумыг баталжээ.

3ам, тээврийн хөгжлийн яамны Автотээврийн бодлогын хэрэгжилтийг зохицуулах газрын Тээвэр зохион байгуулалтын хэлтсийн дарга Э.Мөнхнасан “Цахим гэрчилгээ нийлүүлэх нээлттэй сонгон шалгаруулалт хийгдсэн. Гэрээ байгуулагдаад энэ сард эхний бүтээгдэхүүнүүд нийлүүлэгдэнэ.

Үүний дараа 580,000 ширхэг цахим гэрчилгээ нийлүүлэх сонгон шалгаруулалт зарлагдана.

Эхний 447,000 тээврийн хэрэгслийн гэрчилгээг нийлүүлэх байгууллагаар “Бодь” групп шалгарсан гэсэн мэдээлэл өгсөн. Тус компани бүтээгдэхүүнээ оруулж ирээд программ хангамжийг хариуцаад явж байгаа. Худалдан авах ажиллагаа хугацаа шаарддаг учраас тавдугаар сарын эхэн үед цахим гэрчилгээ олгох ажил хойшлогдсон.

Худалдан авах ажиллагаа, төрийн байгууллагуудын бүртгэлийн системийг нэгтгэх ажил дуусаж байна.

Тавдугаар сарын сүүлээр иргэдийн машинд цахим гэрчилгээг наах ажил эхэлнэ. Энэ үеэр мэдээлэл өгнө.

Эхний байдлаар нийтийн тээврийн 700 автобус болон төрийн байгууллагын машинуудад цахим гэрчилгээг нааж, программ хангамжуудын туршилтыг өнгөрсөн хоёр сарын хугацаанд хийж, сайн цэгцэлж авлаа” гэсэн мэдээллийг өгөв.

Тээврийн хэрэгслийг цахим гэрчилгээтэй болгосноор товчоодоор орж, гарах болон зогсоолын төлбөр тооцоо онлайн хэлбэрт шилжинэ. Төлбөр тооцоо төлөх уламжлалт аргыг хална. Чиргүүл, мопед, мотоцикл цахим гэрчилгээнд хамрагдана хэмээн Нийслэлийн мэдээлэл, технологийн газрын дарга О.Чинзориг мэдээлж байсан юм.