Элчин сайд Т.Бадрал БНХАУ-ын даргад итгэмжлэх жуух бичгээ өргөн барилаа

Монгол Улсаас БНХАУ-д суугаа Онц бөгөөд Бүрэн эрхт Элчин сайд Т.Бадрал 2023 оны дөрөвдүгээр сарын 24-ний өдөр БНХАУ-ын дарга Ши Жиньпинд итгэмжлэх жуух бичгээ өргөн барилаа.

Цар тахлын улмаас гадаад улсаас БНХАУ-д суух Элчин сайд нарын итгэмжлэх жуух бичгийг хүлээн авах ёслолын үйл ажиллагааг сүүлийн хоёр жилийн хугацаанд зохион байгуулаагүй байна. Энэ удаагийн ёслолд 70 улсын Элчин сайд оролцож, итгэмжлэх жуух бичгээ өргөн барьжээ.
Элчин сайд Т.Бадрал энэ үеэр Монгол Улсын Ерөнхийлөгч У.Хүрэлсүхийн мэндчилгээг Ши Жиньпин даргад уламжилж, Монгол, Хятадын иж бүрэн стратегийн түншлэлийн харилцааг шинэ шатанд гаргах чиглэлээр Элчин сайдын хувиар бүхий л хүчин чармайлтаа дайчлан ажиллах болохоо илэрхийлэв.

БНХАУ-ын дарга Ши Жиньпин Монгол Улсаас БНХАУ-д суух Элчин сайд Т.Бадралд баяр хүргэж, Монгол Улсын Ерөнхийлөгч У.Хүрэлсүх болон Монголын ард түмэнд мэндчилгээ дэвшүүлсэн бөгөөд БНХАУ-ын Засгийн газар хоёр орны харилцаа, хамтын ажиллагааг цаашид өргөжүүлэн хөгжүүлэхэд дэмжлэг туслалцаа үзүүлэхээ тэмдэглэсэн байна.

Онцгой байдлын ерөнхий газрын дарга, хошууч генерал Т.Бадралыг 2020 онд БНХАУ-д суух Элчин сайдаар томилсон юм.