Энэ он гарснаар төгрөгийн ханш ам.долларын эсрэг 17.76 хувиар суларчээ

Энэ он гарсаар төгрөгийн ханш ам.долларын эсрэг 17.76 хувиар сулраад байгаа юм. 2020 оны дунд үеэс хойш 2850-ийн түвшинд тогтвортой байсан төгрөгийн ханш ОХУ Украинд халдсанаас хойш буюу хоёрдугаар сарын дунд үеэс хойш ерөнхийдөө огцом суларсан юм.
Дэлхий дахинд инфляц эрчимжихтэй зэрэгцэн Холбооны Нөөцийн банк зэрэг дийлэнх Төв банкнууд мөнгөний бодлогоо чангатгаж байна.
Нийлүүлэлтийн сүлжээний доголдол даамжирсан, Европт эрчим хүчний хямрал нүүрлэсэн зэргээс шалтгаалан валютын, хөрөнгийн болон таваарын зах зээлд тогтворгүй байдал бий болоод байгаа юм.
Ялангуяа инфляцыг зорилтот түвшинд хүртэл тогтворжуулах хүртэл бодлогын хүүгээ нэмэгдүүлсээр байхыг Холбооны Нөөцийн банк удаа дараалан илэрхийлээд байна. Үүнийг дагаад ам.долларын ханшийн өсөлт цаашид ч үргэлжлэх хандлага бий болсон юм.
Монгол Улсын хувьд Төв банк бодлогын хүүг он гарсаар дөрвөн удаа нэмэгдүүлээд байгаа бөгөөд одоогоор 12 хувьтай байна. Дэлхийн улс орнуудын Төв банкны шийдвэрийн улмаас учирч болох сөрөг нөлөөллийг бууруулах зорилгоор илүү хурдацтай нэмэгдүүлсэн гэдгийг Монголбанкнаас мэдээлж байв.
Харин гадаад валютын албан нөөц есдүгээр сард 2.8 тэрбум ам.доллар болж, өмнөх сараасаа 3.7 хувиар өсөөд байна. 2022 он гарсаар тасралтгүй буураад байсан гадаад валютын нөөц сарын дүнгээр бага зэрэг өссөн ч нийт дүнгээр 35.9 хувиар буураад байгаа юм.