МӨНГӨТЭЙ НЬ ХӨГЖМӨӨ ЗАХИАЛНА

Олноо хатан эх нэрээрээ хүндлэгдсэн хатагтай Д.Сарангэрэл засаг болгонд сайд хийх их буян заяанд төржээ. Намтар түүхийг сөхөн харвал анх ЗХУ-д фото зурагаар техникум төгсөж, долоон жилийн дараа буюу 32 жилийн өмнө сэтгүүлчээр сурсан. Түүний ажил, мэргэжлийн замналд эрүүл мэнд, байгаль орчин, хөдөлмөр хамгааллаар сурсан сургууль, эзэмшсэн мэргэжил, ажилласан туршлага, авсан хичээл огт байхгүй мөртлөө өдгөө тэр гурав дахь өөр салбар яамандаа сайдаар залрах гээд хоног өдрөө тоолон сууна.

Түүний өргөн барьсан хуулийн төслийг харвал төдийлөн боловсролтой, мэргэжлийн ур чадвартай гэж харагдахгүй. Ярьж хэлж байгаад нь онц хэрэгтэй юм байхгүй. Намд үйлчилж, улс төрчдийг сонин телевизийнхээ тэргүүн нүүрэнд залж өгсөндөө НАМ-ын итгэлт гишүүн болж, улс төр лүү мацсан байдаг л нэг сэтгүүлч.

Эрүүл мэндийн сайдаар ажиллахдаа ковидыг дотроо алдаагүй нь гавьяа гэж ярьдаг ч нийгмийн сэтгэл зүй эмзэг мэдрэмтгий үед иргэдийг айдсаар нь удирдсан менежмент нь хожмоо жинхэнэ хороо тарьж гадаадад гацаах, зах замбараагүй хөл хорих, хил гааль гацах гээд хамаг хямралын эхлэл болсон. Нэг өвчтнийг найман саяын зардлаар 67 хоног эмчлэх, анхны өвчтөндөө монгол нэр өгөх, удирдсан эмнэлгээ ч өөд нь татаж яваагүй мафижсан нөхрийг ардын баатар болгох… зэргээр энтертайнмент яам шиг байж билээ.

Буянтай эгчийгээ дагаад аль нэг яаманд зөөлөн суудалд тухалчих санаатай тойрон хүрээлэгчид нь “сайд нар мэргэжлийн байх албагүй” гэдэг мессеж зохион байгуулалттайгаар цацаж байх шиг. Энэ улсад мэргэжил, мерит зарчим гэж байдаггүй бол дуртай нь хагалгаа хийгээд, барилга барьж, зам тавь, хэлэлцээр хий. Чаддаг хүнийг нь бодлого тодорхойлох шат хүртэл дээш нь гаргахгүй. Чадах юмгүй нь харин лифтээр ганцаараа өндөрт өгсөнө.

Хүн өөрөө зарчмын хувьд өөрийгөө голох, салбарын хүнд нь орон зайг нь орхих, залуу үедээ ирээдүйг нь үлдээх ухамсартай байх ёстой. Гэтэл хор хутгаад уу, хувь нийлүүлээд үү дуртай салбартаа сайдын албанд заларсаад байгаад ямар сайндаа “Хатан эх” нэртэй болсон байх вэ дээ.

Манай улс оронд яг үнэндээ ямар ч бодлого, ирээдүйн хөгжлийн зураглал байхгүйг дандаа л салбарын тухай ямар ч ойлголтгүй, туршлагагүй намчдыг сайдаар томилж, 1.5 жилийн настай засгийн газар нь улс байгуулж тоглодгоос харж болно. Харамсалтай.

МӨРЧ