БНСУ руу хувийн байгууллагууд хөдөлмөрийн гэрээгээр зуучилдаггүйг анхааруулж байна

Манай улсын ХНХЯ БНСУ-тай хөдөлмөр эрхлэлтийн талаар хамтран ажиллаж байна. Тодруулбал, тус улсын Хөдөлмөр эрхлэлт, хөдөлмөрийн яамтай “Хөдөлмөр эрхлэх зөвшөөрөл олгох тогтолцоо”-ны гэрээг байгуулж, энэ дагуу ажилтан илгээх болон хүлээн авах Харилцан ойлголцлын санамж бичгийн хэрэгжилтийг хангуулан ажиллаж байна.

ХНХЯ-ны харьяа Хөдөлмөр, халамжийн үйлчилгээний ерөнхий газар Монгол Улсын иргэдийг БНСУ руу хөдөлмөрийн гэрээгээр ажиллахад зуучлах үйл ажиллагааг хариуцан явуулдаг. Иймд БНСУ руу хөдөлмөрийн гэрээгээр хувийн байгууллагууд зуучилдаггүй болохыг анхаарч, болзошгүй эрсдэлээс урьдчилан сэргийлэхийг сануулж байна. БНСУ-д Хөдөлмөрийн гэрээгээр ажиллахтай холбоотой мэдээллийг Хөдөлмөр, халамжийн үйлчилгээний ерөнхий газарт хандан дэлгэрэнгүй байдлаар авах боломжтой аж.