Бусадтай бүлэглэн найзынхаа гэрээс 20 сая төгрөг дээрэмджээ

Бусдын гэрт нэвтэрч, хүч хэрэглэн дээрэм үйлдсэн этгээдүүдийг илрүүлжээ.

Тодруулбал, өнгөрсөн Баасан гарагийн 22:20 цагийн орчимд Цагдаагийн байгууллагын 102 тусгай дугаарын утсанд “Баянзүрх дүүргийн 8-р хорооны тоотод хар бараан өнгийн малгайтай цамцтай, масктай үл таних хоёр этгээд дайран орж ирж тус тоотын оршин суугчид хүч хэрэглэн бэлэн 20 сая төгрөг дээрэмдсэн” гэх дуудлага мэдээлэл бүртгэгдсэн байна.

Үүний дагуу Эрүүгийн цагдаагийн албаны Хүнд гэмт хэрэгтэй тэмцэх хэлтэс, Нийслэлийн цагдаагийн удирдах газрын Хүнд гэмт хэрэгтэй тэмцэх хэлтэс болон БЗД-ийн Цагдаагийн 3 дугаар хэлтсээс алба хаагчид хамтран шалгалтын ажиллагааг явуулахад хохирогчийн найз гэх “Д” гэгч 31 настай эмэгтэй, нөхөр “Я” болон бусад “З”, “А”, “Ц” нартай бүлэглэн үгсэн тохиролцож, уг гэмт хэргийг уг гэмт хэргийг үйлдсэн байж болзошгүй нөхцөл байдал тогтоогджээ.

Одоогоор гэмт хэрэгт сэжиглэгдэж буй “Д”, “Я”, “А” нарыг БЗД, ХУД-ийн нутаг дэвсгэрээс баривчилж, “З”, “Ц” нарын эрэн сурвалжилж байгаа талаар Цагдаагийн байгууллагаас мэдээллээ.

Мөн иргэд гэртээ бэлэн мөнгө их хэмжээгээр хадгалахгүй байх, их хэмжээний бэлэн мөнгөтэй байгаагаа бусдад мэдэгдэхгүй байхыг сэрэмжлүүлэв.