Цаг уурын орчин шинжилгээний газрын харьяа Ус цаг уурын орчны мэдээллийн хүрээлэнгийн эрх бүхий албан тушаалтнуудыг цагдаагийн байгууллагаас шалгаж эхэлсэн байна. Албаны эрх мэдлээ урвуулан ашиглаж төсвийн хөрөнгийг зориулалтын бусаар ашигласан зэрэг хэд хэдэн асуудлаар Ус цаг уурын орчны мэдээллийн хүрээлэнгийн захирал Г.Сарантуяа болон нягтлан бодогч Ч.Ганчимэг нарт хэрэг үүсгэн шалгаж байгаа юм байна.
Шалгалтаар тус хүрээлэнгийн захирал Г.Сарантуяа нь Орчил урсгал, прогнозын хэлтэс, Гадаргын усны судалгааны хэлтсийн ажилтнуудад нэмэлт цалин олгож, олгосон мөнгөө бэлнээр эргүүлэн авч, хувийн хэрэглээндээ зарцуулдаг байсан нь тогтоогдсон байна. Мөн тус байгууллагын эд хөрөнгийн бүртгэлд бүртгэгдээгүй атлаа өндөр үнэлгээтэй эд зүйлийг байгууллагын хэрэгцээнд худалдан авсан нь шалгалтын явцад илрээд байгаа юм байна.
Г.Сарантуяагийн хувьд Цаг уурыг орчин шинжилгээний газарт олон жил ажилласан туршлагатай, тэр хэрээрээ удирдах албан тушаалд томилогдсон хэмээгддэг ч тэр бүр хүний анхаарлыг татаад байдаггүй энэ газраас албан тушаалаа ашиглан хувьдаа завшиж байгаад хууль хяналтын байгууллагын анхааралд өртсөн нь энэ гэнэ.
Ямартай ч энэ хэргийг Г.Сарантуяа захирал ганцаараа үйлдээгүй бөгөөд тус хүрээлэнгийн нягтлан бодогчоор ажилладаг Ч.Ганчимэгтэй хамтарч хийсэн нь цагдаагийн байгууллагаас хийсэн шалгалтаар илрээд байгаа аж. Хэргийг цагдаагийн байгууллагаас үргэлжлүүлэн шалгаж байгаа юм байна.
+ There are no comments
Add yours