“Омикрон” хувилбар бүртгэгдсэн улс орнуудыг танилцуулж байна

Коронавирусийн шинэ хувилбар буюу В.1.1.529 хувилбарыг ДЭМБ 2021 оны арваннэгдүгээр сарын 26-ны өдөр “Omicron” хэмээн нэрлэж, “онцгой анхаарал татаж буй” ангилалд оруулаад буй. Тэгвэл дараах улс орнуудад Омикрон хувилбар бүртгэгдсэн байна.

Тодруулбал, Энэ штамм анх Ботсвана, Өмнөд Африк, Хонконгт бүртгэгдсэн бөгөөд Өмнөд Африкаас ирсэн жуулчнаас энэ хувилбар илэрчээ. ВВС агентлагийн мэдээлснээр, Өмнөд Африкт хүн амынх нь ердөө 24 хувь нь вакцинд хамрагдсанаас үүдэн улс дотор нь болон хилийн чанадад энэ штамм хурдацтай тархахад нөлөөлсөн байж болзошгүй аж.

Одоогоор Израиль улсад Малавигаас ирсэн нэг жуулчнаас омикрон штамм илэрсэн, дахин хоёр хүн энэ штаммаар халдварлагдсан байж болзошгүй гэж үзэж байгаа аж. Бельги улсад Египет, Туркээс ирсэн жуулчнаас арваннэгдүгээр сарын 26-ны өдөр омикроны халдвар илэрсэн нь Европт шинэ төрлийн штамм бүртгэгдсэн анхны тохиолдол болсон байна.

Мөн Британи, Германид омикроны хоёр тохиолдол, Итали, Чехд тус бүр нэг тохиолдол илэрчээ. Мөн энэ шинэ хувилбараас үүсгэгдсэн халдвар Дани, Нидерланд руу зөөвөрлөгдсөн байж болзошгүй гэж таамаглаж байгаа аж. Учир нь Нидерландад Өмнөд Африкаас очсон 60 гаруй зорчигчоос коронавирусийн халдвар илэрсэн бөгөөд энэ халдвар чухам ямар штаммаар үүсгэгдсэн нь одоогоор тодорхойгүй байгаа аж.

Орост энэ төрлийн вирус илэрсэн гэх мэдээлэл арваннэгдүгээр сарын 28-ны өдөр гарч байсан ч Оросын Хэрэглэгчийн хяналтын газар “Ням гарагийн байдлаар ОХУ-ын нутаг дэвсгэр дээр омикрон штамм бүртгэгдээгүй” хэмээн мэдээллийг няцаагаад байгаа юм.