Гал түймэр гарч болзошгүй 62,783 зөрчлийг илрүүлжээ

Онцгой байдлын байгууллагаас улсын хэмжээнд гэр хорооллын айл өрхүүдэд гамшгаас хамгаалах болон гал түймрийн улсын хяналтыг хэрэгжүүлэх төлөвлөгөөт хяналт шалгалтыг хийжээ.

Гал түймрийн аюулаас урьдчилан сэргийлэх, хяналт шалгалтыг төв, орон нутгийн Онцгой байдлын байгууллагын нийт 1,365 ажилтан, алба хаагч зохион байгуулж, 437 баг, хороо, дүүргийн 71,155 айл өрхийг хамруулсан юм.

Алба хаагчид гал түймэр гарч болзошгүй 62,783 зөрчил дутагдлыг илрүүлж, 15,801 зөрчлийг газар дээр нь арилгуулан, 46,982 зөрчлийг арилгуулахаар гал түймрийн улсын хяналтын байцаагчийн заавал биелүүлэх албан шаардлага, мэдэгдэл, танилцуулгыг бичиж тухайн аймаг, нийслэл, дүүрэг, баг, хорооны холбогдох албан тушаалтанд хүргүүлж биелэлтийг хангуулан ажиллав.

Хяналт, шалгалтаар цахилгааны холболт, ашиглалт, угсралтын аюулгүй байдал, гэр, байшингийн хоорондын аюулгүйн зай хэмжээ зөрчсөн, үнс, нурмаа ил задгай асгасан үнс нурамны сав таггүй, пийшин зуух гэмтэлтэй, яндангийн хамгаалалт хийгдээгүй, залгаас буруу, шуурхай албаны автомашин очих боломжгүй мухар гудамж, өндөр хүчдэлийн шугаман доор буусан, пийшин зуухны амны дор 700х500 мм-ийн хэмжээтэй металл хамгаалалт байрлуулаагүй, шингэрүүлсэн шатдаг хийг ашиглаж аюулгүй байдлаа хангаагүй зэрэг зөрчил дутагдлууд нийтлэг илэрлээ гэж Онцгой байдлын ерөнхий газраас мэдээллээ.