Н.Алтанхуяг: Улс орон 2-3 дарангуйлагчийн гарт орчих шиг боллоо

УИХ-ын намрын чуулганы ээлжит хуралдаан эхэллээ. Өнөөдрийн хуралдаанаар 2022 оны Улсын төсвийн тухай хуулийн төслийг хэлэлцэнэ.
УИХ-ын гишүүн Н.Алтанхуяг чуулганы нэгдсэн хуралдааны эхэнд үг хэллээ.
Тэрбээр, Монгол Улсад улс төрийн хоёр нам бий. Гэтэл өнөөдөр нэг нам нь нөгөөгөөрөө тоглож байна. Ардчилсан намаар ингэж тоглож байхад Монголд хууль хэрэгжиж байгаа гэж итгэхэд бэрх боллоо. Улсын бүртгэл зэрэг төрийн байгууллагууд дагаж далдганадаг даргынхаа заавраар ажиллаж байна. Энүүгээр далимдуулж хэд хэдэн сонгуульд өрсөлдөгчгүй ялалт байгуулж байна. Ингэж болох юм уу? МАН 60 гаруй гишүүнтэй болсноос хойш улс орон завхарч байна. Мөнгө төгрөг зах замбараагүй зарцуулж байна. МАН-ынхныг бүгдийг нь буруутгахгүй. Энд эрүүлээр сэтгэдэг, зөв зүйл ярьдаг гишүүд бий.

Улс орон 2-3 дарангуйлагчийн гарт орчих шиг боллоо. Элбэгдорж гэж дарангуйлагч байсан бол одоо Хүрэлсүх гэж дарангуйлагч гарч ирж байна уу? Хаашаа юм гэв.
УИХ-ын гишүүн Д.Ганбат, 2022 оны Төсвийн тухай хуулиар гурав хоногийн завсарлага авах АН-ын бүлгийн саналыг илэрхийлэв.

УИХ-ын дарга Г.Занданшатар, Төсвийн тухай хуулийг 2021 оны 11-р сарын 15-ны дотор батлах ёстой учир 3 хоногийн завсарлага өгөх боломжгүй байна. Өнөөдрийн 14.00 цаг хүртэл завсарлага өгч байна гээд дараагийн асуудлыг хэлэлцэж эхэллээ.