Коронавирусын эсрэг вакцинд 50,9 сая хүн хамрагджээ

Дэлхий даяар хийгдсэн коронавирусний вакцины тунгийн тоо 7 тэрбумаас давжээ. Үүний талаас илүү хувийг БНХАУ (2.3 тэрбум), Энэтхэг (1.1 тэрбум), АНУ (0.4 тэрбум) гэсэн гурван улс эзэлж байгааг улс орнуудын эрх баригчдын албан ёсны мэдэгдэл, хэвлэл мэдээллийн хэрэгслүүдийн статистик мэдээнд үндэслэн гаргасан ТАСС агентлагийн тоон мэдээлэл харуулсан байна.

Одоогийн байдлаар 7.001 тэрбум тун вакцин тариад байна. Харин дэлхий даяар яг хэчнээн хүн вакцины бүрэн тунд хамрагдсан болохыг одоогоор тодорхойлох боломжгүй байна. Учир нь олон улс орон зөвхөн вакцины гэрчилгээжсэн тунгийн тоо, хийсэн тунгийн тоог л мэдээлж байгаа аж.

Үүний зэрэгцээ дэлхий даяар вакцинжуулалтын хурд удааширсан байна. Өмнө нь ердөө 29 өдрийн дотор нэг тэрбум тун вакцин тарьж байсан бол дараагийн тэрбум тунг хийхэд 37 хоног зарцуулжээ.

Арабын Нэгдсэн Эмирт Улс болон Мальта улсын хүн амын 90 гаруй хувь нь вакцин хийлгэжээ. Харин Португал, Куба, Чили, Исланд Камбож, Испани, Сингапур, Бруней, БНСУ зэрэг орнуудад хүн амын 80 гаруй хувь нь дор хаяж вакцины нэг тунд хамрагдсан байна.

ОХУ-ын хувьд коронавирустэй тэмцэх шуурхай штабынх нь мэдээллээр, 50.9 сая гаруй хүн вакцины хоёр тунг хийлгэсэн бол 56.8 сая гаруй хүн эхний тунд хамрагджээ. Тус улсын хэмжээнд “COVID-19”-ийн нийтийн дархлааны түвшин 46.8 хувьтай байна.

МОСКВА. /TASS/