“Шинж тэмдэг илэрвэл эмчилгээг шууд эхлүүлнэ, шаардлагагүй бол шинжилгээ өгөхгүй байхыг хүсье”

Эрүүл мэндийн яамны хэвлэлийн хурлаар Эрүүл мэндийн сайдын зөвлөх О.Батбаяр оролцож, мэдээлэл өглөө.

О.Батбаяр: “Олон улс коронвируст халдварын тохиолдлын тоог PCR шинжилгээгээр баталгаажуулж олон нийтэд мэдээлдэг. Манай улсад анх 2020 оны гуравдугаар сард зөөвөрлөгдсөн тохиолдол бүртгэгдсэнээс хойш зөвхөн PCR шинжилгээгээр батлагдсан тохиолдлын тоог олон нийтэд мэдээлж ирсэн.

Зургадугаар сарын 25-нд ДЭМБ коронавируст халдвартай холбоотой лабораторийн оношилгооны удирдамжийг өөрчилсөн. Ингэхдээ PCR шинжилгээний хариу 24-48 цагийн дотор амжиж гарахгүй бол ач холбогдолгүй гэж зөвлөсөн. Үүнийг үндэслэж манай улс тав болон зургаадугаар сард альфа хувилбарын давлагааны үед иргэдэд эмнэлгийн тусламж үйлчилгээг ойртуулахын тулд эмчилгээнд оруулах журмыг баталсан.

Ингээд есдүгээр сар гарч, дельта хувилбарын давлагаа эхлэхэд хавьтал, шинж тэмдэгтэй байвал эмнэл зүй дээр үндэслэж буюу заавал шинжилгээ хийхгүйгээр эмчилгээ хийх чиглэл өглөө. Энэ бол халдварын онцлог, эрүүл мэндийн салбарын нөөц зэргээс шалтгаалж өөрчлөгдөж байдаг зүйл гэдгийг дахин хэлье.

Бид өдөрт 500-700 сая төгрөгийг шаардлагагүй шинжилгээнд зарлагадаж байна. Иймд иргэдэд хандаж хэлэхэд, шаардлагагүй бол коронавирусийн эсрэг шинжилгээ өгөхгүй байхыг хүсэж байна” гэлээ.