2017 онд баригдсан сургуулийн хана, тааз, шал нь цөмөрч үйл ажиллагаа явуулах боломжгүй болжээ

2017 онд баригдаж ашиглалтанд орсон Орхон аймгийн Шанд багийн 17-р сургуулийн өргөтгөлийн барилга өнөөдөр хана, тааз, шал нь цөмөрч аюултай нөхцөл байдал үүсчээ. Тус ажлын гүйцэтгэгчээр “Урагшлах” ХХК ажилласан бөгөөд дөрвөн жилийн настай чанаргүй барилга хүлээлгэн өгчээ. Одоогоор тус сургуулийн үйл ажиллагааг түр зогсоож дүгнэлт гаргахаар мэргэжлийн байгууллагын баг ажиллаж байгаа аж. Гүйцэтгэгч компаний удирдлагуудад мөн мэдэгдэл хүргүүлжээ.

“Урагшлах” ХХК нь Гадаад дотоод худалдаа, Зочид буудал, амралтын газар, түр хоноглох байрны үйлчилгээ, Барилга угсралтын ажил, Зоогийн газар, гуанз, цайны газрын үйлчилгээний чиглэлээр үйл ажиллагаа явуулдаг бөгөөд Хөвсгөл, Мөрөн, 8-р баг, 1-р хэсэгт хаягтай 2006 оноос хойш үйл ажиллагаа явуулж буй ХХК юм байна.