Танилц, Монгол Улсын Тагнуулын ерөнхий газрын дарга…

Засгийн газрын ээлжит хуралдаанаар Тагнуулын ерөнхий газрын даргаар П.Одонбаатарыг томилсон юм. Хурандаа П.Одонбаатар нь Тагнуулын ерөнхий газрын тэргүүн дэдээр ажиллаж байгаад өнгөрсөн долоо хоногт Засгийн газрын хуралдаанаар хэлэлцэгдэж чөлөөлөгдсөн Д.Гэрэлийн үүрэгт ажлыг түр орлон гүйцэтгэж байв.

Сүүлийн үед Тагнуул, Цагдаа, Хилийн цэрэг, Батлан хамгаалах, Гадаадын иргэн харьяат гэх мэтээр Засгийн газрын агентлагуудын дарга нарыг улс төрийн эрс нөлөөтэйгөөр томилж, чөлөөлөх болсон. Энэ утгаараа Ерөнхий сайд У.Хүрэлсүхийн фракциас энэ эгзэгтэй мөчид Тагнуулын ерөнхий газрын даргыг ямар хүнээр удирдуулах бол гэсэн сонирхол олны анхаарлыг ихэд татаж байсан юм.

Тагнуулын ерөнхий газрын даргад Ерөнхий сайд У.Хүрэлсүхийн шинэхэн томилогдсон зөвлөх Ж.Энхбаяр, Тагнуулын ерөнхий газрын Сөрөх тагнуулын газрын дарга асан Д.Цогтбаатар нарын аль нэг нь томилогдох нь гэсэн “бор шувуу” эрчтэй нисч байсан ч ийнхүү тус байгууллага дотроосоо тэр дундуу тэргүүн дэд даргаар ажиллаж байсан хүн томилогдсоноор МАН-ын даргад Сү.Батболд нөлөөтэй байна гэсэн хардлага жиг жуг болон хийсэх болов.

Монгол Улсын Тагнуулын ерөнхий газрын шинэхэн дарга, хурандаа П.Одонбаатар Дундговь аймгийн Мандалговь сумын харьяат, 1974 онд төрсөн, 46 настай. Түүний төрийн тусгай албанд ажилласан ажлын туршлага нь ч Дундговь аймгийн Цагдаагийн хэлтэст мөрдөн байцаагчаар ажиллахаас эхэлж байсан юм байна.

Ингээд УАБХЕГ-ын Мөрдөн байцаах хэлтэст мөрдөн байцаагч, ТЕГ-ын Мөрдөн байцаах хэлтэст ахлах мөрдөн байцаагч, тасгийн дарга, хэлтсийн орлогч дарга, хэлтсийн дарга, албаны дарга, Орон нутгийн газрын дарга зэргээр бүхий шатанд ажиллаж байсан намтартай. Харин тэр бүр хүмүүс мэдэхгүй нэг зүйл нь тэрбээр маш сайн уяач гэнэ. Улс төрд ойрхон, төрийн өндөр алба хашиж байгаа хэн боловч уяа, морь руу зүтгэж, имиж бүрдүүлдэг болсон орчин цагт Тагнуулын шинэхэн даргын хобби хачирхмаар зүйл биш байж болох ч анхаарал татах юмны нэг зүй ёсоор орж буй. Учир нь тэр улсын алдар уяач аж. Аймаг, бүсийн уралдаанд олонтоо айраг түрүүтэй тэрбээр, “адууны буянаар олон сайхан найз нөхөдтэй болсон” хэмээн сэтгүүлчдэд ярилцлага өгч байсан түүхтэй. Энэ утгаараа 2020 оны сонгуулиар Дундговьд “учиргүй хайртай” болсон Сү.Батболдын нөлөөлөл уг томилгоонд түлхүү орсон байхыг үгүйсгэх аргагүй юм.

Дашрамд дурдахад, 2020 оны наймдугаар сарын 13-ны өдрийн Засгийн газрын хуралдаанаар Тагнуулын ерөнхий газрын тэргүүн дэд даргаар П.Одонбаатарыг томилж байсан бол сар хүрэхгүй хугацааны дараа тус газрын даргаар томилогдсон нь дээрх хардлагыг төрүүлэхээс ч аргагүй байдлыг бий болгосон хэмээн харж болохоор байгаа юм.