Өмнөд Солонгосын сүмээс тарсан коронавирусийн халдварын тохиолдол 23 болж нэмэгдлээ

Тэгвэл уг сүмийн мөргөлчдөөс халдвар авсан хүний тоо өнөөдөр 23 болж нэмэгджээ.

Өнөөдөр Өмнөд Солонгос даяар шинээр халдвар авсан хүний тоо 31-ээр нэмэгдэж, нийт 82 болсон байна.

Өчигдөр Дэгү хотын Есүсийн Шинчёнжи сүмийн захиргаа 10 гишүүн нь коронавирусийн халдвар авсныг баталсан юм.

Халдвар тараасан 61 настай эмэгтэй тус сүмийн дөрвөн удаагийн цуглаанд оролцсон болохыг бас мэдээлжээ.

Эрх баригчид тус сүмийн бусад гишүүдийн мөрөөр шалгах ажлыг явуулахаар Сөүлээс зүүн өмнө зүгт 300 км зайтай оршдог Дэгү хот руу тусгай баг илгээсэн байна.

Хамгийн сүүлд Ням гарагт болсон цуглаанд халдвар тараагч эмэгтэй оролцсон бөгөөд энэ үеэр 460 орчим хүн цугларсан гэнэ.

Түүнээс өмнөх гурван удаагийн цуглаанд хэдэн хүн оролцсон тухай мэдээлэл байхгүй байна.

Өмнөд Солонгост 14 сая загалмайн шашинтан байдаг гэсэн тоо бий. Тэдгээрийн 2 сая орчим нь энэ шашны уламжлалт бус урсгалын сүмүүдэд мөргөдөг байна.

Халдварын голомт болоод байгаа Есүсийн Шинчёнжи сүм нь Өмнөд Солонгос даяар 200,000 гаруй гишүүнтэй бөгөөд үүсгэн байгуулагч Ли Ман Хэ нь амьд бурханд өргөмжлөгддөг гэнэ. Тус сүм нь загалмайн шашны үндсэн урсгалын сүсэгтнүүдийг өөрийн урсгалд урвуулах ажлыг идэвхтэй явуулдаг тул Өмнөд Солонгосын бусад сүмүүд үүдэндээ Шинчёнжи сүмийн гишүүдийг нэвтрүүлэхийг хориглосон утгатай тэмдэглэгээ байрлуулсан байдаг ажээ.

Эх сурвалж: Reuters