Арван настай хүүгийнхээ нүдэн дээр эхнэрээ хутгалж амийг нь бүрэлгэжээ

Нийслэлийн Сүхбаатар дүүргийн 12 дугаар хороонд байрлах нийтийн байранд есдүгээр сарын 3-4 нд шилжих шөнө хүн амины ноцтой хэрэг гарчээ. Тодруулбал, тус өдрийн шөнийн 04.00 цагийн орчимд Архангай аймагт оршин суух хаягтай 53 настай Б нь согтуурсан үедээ 40 настай эхнэр болох А-г хоёр удаа буюу хөхний доод талд нэг, цээжний зүүн талын хавирганы нуман хэсэгт нэг удаа 25см урттай хар өнгийн хутгаар хутгалж амь насыг нь бүрэлгээд хэргийн газраас зугтсан байна. Хэргийн талаар анх байрны оршин суугчид цагдаагийн байгууллагад мэдээлэл өгсөн бөгөөд цагдаа нарыг ирэхэд талийгаач хаалгаа алдалж, газар унасан байдалтай байжээ.

Оршин суугчдын хэлж буйгаар талийгаач эмэгтэйг удаа дараа нөхөр нь зодож, дарамталдаг байсан бөгөөд хэрэг гарах үед 10 настай хүү нь хажууд нь байсан аж. Тухайн үед хүү маш их айж, цочирдсон байсан бөгөөд хөрш айлынх нь хүн гэртээ оруулж түр тайвшруулсан байна.

Хэрэг үйлдсэн сэжигтэн Түмэнч овогт Чимэддоржийн Баярсайхан нь 1966 оны есдүгээр сарын 02-ны өдөр Архангай аймгийн Эрдэнэмандал суманд төрсөн, 53 настай, бүрэн дунд боловсролтой, мэргэжилгүй, эрхэлсэн тодорхой ажилгүй, Эрдэнэмандал суманд мал маллаж байгаад 2018 оноос Улаанбаатар хот СБД-ийн 12 дугаар хороонд эхнэр, хүүхдийн хамт түр оршин сууж байжээ. Тэрбээр оргох үедээ улаан подволк, ногоон өнгийн биеийн тамирын өмдтэй, цагаан пүүзтэй явсан аж.