Ерөнхийлөгчийн өргөн мэдүүлсэн хуулийн төслийг хэлэлцэхээр гишүүдийг дуудуулжээ

Монгол Улсын Ерөнхийлөгч Х.Баттулга Үндсэн хуульд заасан бүрэн эрхийнхээ хүрээнд УИХ-ын тухай хууль болон Чуулганы хуралдааны дэгийн тухай хуульд нэмэлт өөрчлөлт оруулах тухай хуулийн төслийг өргөн мэдүүлээд буй. Уг хуулийн төсөл батлагдсанаар  гишүүдийн олонхи УИХ-ын даргыг үүрэгт ажлаас нь чөлөөлөх саналыг албан ёсоор тавьж, тогтоолын төслийг өргөн мэдүүлснээр УИХ хэлэлцэн, ёсоор болгосон бол чөлөөлөх хууль эрх зүйн боломж үүсэх юм.

УИХ-ын дарга М.Энхболд өнгөрсөн долоо хоногийн баасан гаригт “Ерөнхийлөгчийн өргөн барьсан хуулийн төслийг Төрийн байгуулалтын байнгын хороонд шижлүүлсэн” гэж мэдэгдсэн. Байнгын хороогоор уг хуулийн төслийг хэлэлцэхээс өмнө УИХ дахь  намын бүлгүүд хуралдаж, байр сууриа нэгтгэх учиртай. Гэвч өнгөрсөн даваа гаригт  УИХ дахь МАН-ын бүлэг хуралдаагүй. Харин УИХ дахь АН-ын бүлгээр хуулийн төслийг хэлэлцээгүй юм.

Ерөнхийлөгчийн зүгээс хуулийн төслөө өргөн мэдүүлэхдээ Засгийн газрын саналыг авч, хуралдаанаар нь хэлэлцүүлсэн. Тиймээс ч эрх баригч нам доторх У.Хүрэлсүхийн талынхан хуулийн төслийг дэмжинэ гэсэн хүлээлттэй байгаа юм. УИХ-ын чуулганы нэгдсэн хуралдаан явагдахгүй байгаатай холбогдуулан, У.Хүрэлсүхийн талаас 20 гаруй гишүүд гадны орнуудыг зориод байсан. Тэгвэл гадаадад буй гишүүдийг ирц бүрдүүлэхээр дуудуулж эхэлсэн байна.

Улмаар өнөөдөр 11:00 цагт УИХ дахь МАН-ын бүлэг хуралдахаар тов зарлаж, гишүүдэд зар тараагаад байгаа юм.Бүлгийн хурлаар Ерөнхийлөгчийн өргөн мэдүүлсэн хуулийн төслийг хэлэлцсэний дараа үргэлжлүүлэн, Төрийн байгуулалтын байнгын хороо хуралдах чигтэй байна.