Приус автомашины дөрвөн дугуйг бүлэглэн хулгайлдаг этгээдүүдийг баривчилжээ

1 min read

Шинэ жилийн баяр болж байгаатай холбогдуулан хулгайн гэмт хэргийн тоо сүүлийн өдрүүдэд өсөх хандлагатай байна. Нийслэлийн шуурхай удирдлагын төвд “Приус” загварын автомашины дөрвөн дугуй алга болчихлоо” гэх дуудлага өдөр алгасахгүй ирдэг болсон аж.

Өдөрт дунджаар 2-3 автомашины дугуй алга бодог гэх мэдээллийг албаныхан өгч байгаа юм. Иймд Нийслэлийн дүүргүүдийн цагдаа нар Приус маркийн машины хучлага, дугуйг удаа дараа хулгайлж байгаа этгээдүүдийг барих нэгдсэн арга хэмжээ өрнүүлсэн байна. Ажиллагааны үеэр Сонгинохайрхан дүүргийн харъяат эрхэлсэн тодорхой ажилгүй 19-24 насны дөрвөн этгээдийг үйлдэл дээр нь баривчилжээ.

Дээрх бүлэглэн хулгайн гэмт хэрэг үйлддэг этгээдүүд нь нийт 25 удаагийн үйлдлээр 100 ширхэг дугуй хулгайлж, худалдан борлуулсан нь мөрдөн шалгах ажиллагааны үед тогтоогдсон аж. Мөн тэд хулгайлсан гэх дугуйнуудаа цахим орчинд зар тавьж борлуулдаг байжээ.

Түүнчлэн шинэ жилийн баяраас гарч ирсэн хүмүүсийг албаар өдөөн хатгаж, маргаан үүсгээд бүлэглэн зоддог байна. Улмаар салгах гэж ирж буй дүр үзүүлэн цүнх, түрийвч, гар утас гэх зэрэг үнэд хүрэх эд зүйлийг нь авч зугтаах үйлдэл цагдаагийн байгууллагад 40 удаагийн үйлдэл бүртгэгджээ.

+ There are no comments

Add yours