“Эрүүл мэндийн сайд Д.Сарангэрэлийг өөрийн хүүгийн жолоочоор ажиллаж байсан хүнийг Хөрөнгө оруулалтын газрын даргаар томилсон” гэх асуудлыг Авлигатай тэмцэх газраас хянан шалгасан байна. Шалгалтаар тус яамны Бодлого төлөвлөлтийн газрын Хөрөнгө оруулалтын хэлтсийн даргын албан үүргийг түр орлон гүйцэтгэгч Ө нь Эрүүл мэндийн сайдын төрсөн хүүтэй найз бөгөөд дээрх ажлын байрны саналыг түүнээс авсны үндсэн дээр томилогдсон нөхцөл байдал тогтоогдсон” байна. Энэ талаар 2018 оны 08 дугаар сарын 27-нд Авлигатай тэмцэх газраас албан ёсоор сэтгүүлчдэд мэдээлэл хийдэг ээлжит цагаараа мэдэгдсэн юм. Тус мэдэгдэлд мэдээлэгдсэн Д.Сарангэрэл сайдын хүү Х.Улам-Өрнөх ТӨБЗГ-ын Худалдан авах ажиллагааны газрын даргаар Ерөнхий сайд асан Ж.Эрдэнэбатын үед томилогдсон юм байна. ТӨБЗГ-ын Худалдан авах ажиллагааны газар нь төрийн өмчит хуулийн этгээдүүдийн худалдан авах ажиллагааг хариуцдаг гол алба юм. Уг газраас төрийн өмчит хуулийн этгээдүүдэд зарлагдах тендерүүдийг хариуцан зохион байгуулдагийг хүмүүс тэр бүр мэдэхгүй байх. Дашрамд дурдахад, УИХ-ын хаврын чуулганаар Нийгмийн бодлого, боловсрол, соёл, шинжлэх ухааны байнгын хорооны хуралдаан дээр Н.Номтойбаяр гишүүн “Төрийн алба дамнасан гэр бүлийн сүлжээ үүсгэчихээд, илтэд эрх ашгийн зөрчил үүсгээд байна” хэмээн Д.Сарангэрэл сайдыг шүүмжилж байсан нь Д.Сарангэрэл сайдын нөхөр асан Д.Хүрэлбаатар нь Улсын Ерөнхий Аудитор, түүний хүү Х.Улам-Өрнөх нь Төрийн өмч, бодлого зохицуулалтын газар/ТӨБЗГ/-ын Худалдан авах ажиллагааны газрын даргаар ажилладагийг хэлсэн хэмээн ойрын эх сурвалж өгүүлсэн юм.
