Өнгөрсөн нэгдүгээр сард Засгийн газрын хуралдаанаас өвлийн улиралд хурдан морины уралдаан зохион байгуулахыг хориглосон шийдвэр гаргасан. Мөн жил бүрийн хаврын тэргүүн сарын шинийн 3-ны өдрөөс тавдугаар сарын нэгэн хүртэлх хугацаанд болох уралдаан, сунгаанд 12 хүртэлх насны хүүхдийг морь унуулахыг хориглосон. Гэвч уяачид хууль зөрчин, амралтын өдрөөр хурдан морины хаврын бүсийн “Дүнжингарав” уралдаан Говьсүмбэр аймгийн Баянтал сумын нутагт болж есөн хүүхэд мориноос унаж гэмтсэнээс гурав нь эмнэлэгт хүргэгджээ. Уралдаанд 10-13 насны хүүхдүүд азарга, их нас, соёолон, эрлийз гэсэн дөрвөн насны морьд унаж уралдсан байна.
Энэ удаагийн “Дүнжингарав” наадмын олны нүдийг орой дээр нь гартал гайхшруулсан зүйл бол соёолон насны уралдаан байлаа. Нар жаргаж байх үед улаан тоосон дундаас барианаас гарсан морьд үдшийн бүрэнхийд барианд орж, Баянталд морь, унаач хүүхдээ хайсан уяачид тал хөндийг цуурайттал “Шараа, Шараа, Гавжийн Шараа” хэмээн орилж буй бичлэг олон нийтийн сүлжээнд тавигдсан байна.
Хахир өвлийн цагт хүүхдээр морь унуулдаг байсан уяачид нэртэй хурган дарга нар эх захаа алдаж шөнийн цагаар уралдаан зохион байгуулсан нь хүүхэд, адуу тамласан үйлдэл биш гэж үү. Өвөл, хавар хүүхдээр морь унуулах нь хүүхдийн эрхийг ноцтой зөрчиж буйн илрэл гэдгийг шүүхийн шийдвэр тогтоосон. Монголчууд хүүхдийн амь нас, эрүүл мэндийг эрсдэлд оруулж зугаацдаг аа хэзээ болих вэ. Морь унаач хүүхдүүд унасан морины наснаас шалтгаалан нар, салхи, бороо, шуурга, цастайг үл анхааран 10-30 километр газар туулдаг.
Өвлийн улиралд хацар, чих, гар хөл нь хайрагдах, бүр хөлдөх ч тохиолдол бий. НҮБ-аас үүнийг бага насны хүүхдийн тэвчишгүй хөдөлмөр гэж шүүмжилдэг ч морины уралдаан бол эртнээс уламжлалтай Монголын ёс заншил, их баяр наадам, уралдааны морийг жаахан хүүхэд л унадаг гэж муйхарлан хаацайлдаг нь гашуун үнэн. Өнөөдөр энд тэнд зохион байгуулагдаж буй аймаг бүсийн хурдан морьдийн уралдаан мөнгөтэй хүмүүсийн зугаацах нэг хэрэгсэл болсон гэдгийг хэн хүнгүй мэдэж байгаа. “Дүнжингарав” наадмыг дур мэдэн зохион байгуулсан, үүнд хүлэг морьдоо сойж уралдуулсан хүүхдийн эрх зөрчсөн уяачид ямар хариуцлага хүлээх вэ.
+ There are no comments
Add yours