Засгийн газрын хуралдаанаар утааны асуудлыг хэлэлцэнэ

Монгол Улсын Ерөнхийлөгч Х.Баттулга оны өмнөхөн утааны асуудлаар онц байдал зарлах тухай саналаа УИХ-д хүргүүлсэн юм. Ерөнхийлөгч тэрхүү саналдаа төр, иргэн, аж ахуйн нэгж, байгууллага бүрийн оролцоог тодорхойлж, үүрэг, хариуцлагыг нь нэмж шийдвэртэй алхам хийхийг тодотгосон билээ. Харин өнөөдрийн Засгийн газрын ээлжит хуралдаанаар утааны асуудлыг хэлэлцэж, шийдэлд хүрэхээр төлөвлөжээ.

Тэгвэл өнгөрсөн даваа гарагт Монгол Улсын сайд, Засгийн газрын Хэрэг эрхлэх газрын дарга Г.Занданшатар нийслэлийн Сонгинохайрхан, Хан-Уул дүүргийн гэр хорооллын айлууд болон Нийслэлийн Засаг даргын Тамгын газарт тус тус ажилласан. Энэ үеэр тэрээр нийслэлийн агаар орчны бохирдлыг бууруулах чиглэлээр авч хэрэгжүүлэх арга хэмжээний богино, дунд, урт хугацааны шийдлийг нягталж Засгийн газрын хуралдаанаар хэлэлцүүлэхээр бэлтгэж байгаагаа дуулгасан юм.

Түүнчлэн агаар, орчны бохирдлыг бууруулах үндэсний хөтөлбөрийг боловсруулж, хэрэгжүүлэх Ажлын хэсгийн хуралдаанд оролцож утаа бууруулахад гэр, байшин, орон сууцтай иргэдэд тус бүрт нь тохирсон дулаан хадгалалт, хамгаалалтын аргыг нэвтрүүлэх нь чухал. 2019 он хүртэл богино, 2021 он хүртэл дунд, 2025 он хүртэл урт хугацаанд мөрдөж ажиллах төлөвлөгөө гаргаж Засгийн газрын хуралдаанд танилцуулахаар төлөвлөж байгаагаа мэдэгдсэн.

С.Онон