Thursday, March 28 2024

Онц байдал зарлах саналыг УИХ-аас байгуулагдсан ажлын хэсэг судлахаар боллоо

УИХ-ын дарга М.Энхболд өчигдрийн чуулганы хуралдааны үеэр утаа, агаарын бохирдлыг бууруулах чиглэлээр УИХ-аас Ажлын хэсэг байгуулах талаар санал гаргасан. Чуулганы хуралдааны дараа УИХ-ын даргын зөвлөл яаралтай хуралдаж УИХ болон Байнгын хороо, Дэд хорооноос агаарын бохирдлыг бууруулах чиглэлээр өгсөн тогтоол, шийдвэрүүдийн хэрэгжилтийг дүгнэх шаардлагатай тохиолдолд хууль, УИХ-ын бусад шийдвэрийн төсөл боловсруулж,  санал, дүгнэлт гарган Засгийн газарт чиглэл өгөх үүрэг бүхий Ажлын хэсгийг байгуулсан билээ. Уг Ажлын хэсгийг УИХ-ын Ё.Баатарбилэг ахалж, бүрэлдэхүүнд нь УИХ-ын гишүүн Д.Хаянхярваа, Д.Эрдэнэбат, Б.Бат-Эрдэнэ, Л.Болд, С.Бямбацогт, Ж.Ганбаатар М.Оюунчимэг, Л.Оюун-Эрдэнэ, Д.Тэрбишдагва, Н.Цэрэнбат, Ө.Энхтүвшин, Л.Элдэв-Очир нар ажиллахаар болов. Ажлын хэсгийн анхны хуралдаанаа өчигдөх хийлээ. Уг хуралдаанд Байгаль орчин, аялал жуулчлалын яам болон Нийслэлийн Засаг даргын Тамгын газрын холбогдох албан тушаалтнууд оролцлоо. Байгаль орчин, аялал жуулчлалын яамны Хүрээлэн буй орчин, байгалийн нөөцийн удирдлагын газрын дарга Г.Нямдаваа Орчны бохирдлыг бууруулах үндэсний хорооноос агаарын бохирдлыг бууруулах талаар 2018 онд авах арга хэмжээний талаар танилцуулав. Ирэх онд орчны бохирдлыг бууруулахад чиглэгдсэн эрх зүйн очрныг сайжруулах, халаалтын зуухнуудыг буулгаж төвлөрсөн дулаан хангамжид холбох, дулаан алдагдлыг бууруулах аян зохион байгуулах, агаарын чанарыг сайжруулах бүсийн зорилтот бүлгийн айл өрхийг боловсруулсан түлшээр хангах зэрэг 12 арга хэмжээг авахаар болжээ.

Мөн Нийслэлийн Засаг даргын Ногоон хөгжил, агаарын бохирдлын асуудал хариуцсан орлогч Ж.Батбаясгалан агаарын бохирдлыг бууруулах талаар авч хэрэгжүүлсэн зарим арга хэмжээний талаар танилцууллаа. Тэрбээр танилцуулгадаа, Монгол Улсын Засгийн газраас өнгөрсөн 1-3 дугаар сард авч хэрэгжүүлсэн гэр хорооллын шөнийн цахилгааныг тэглэх урамшуулалд 114.512 хэрэглэгч хамрагдсан. Хөнгөлөлтийн хугацаанд шөнийн ачаалал 17 хувиар өссөн нь, нийт хөнгөлөлт үзүүлсэн айл өрхийн 15 хувь цахилгаан халаагуур ашигласан тооцоо гараад байна. Түүнчлэн Агаарын чанарыг сайжруулах бүсийн гэр хорооллын зорилтод бүлгийн 4000 өрхийг сайжруулсан түлшээр, 3900 өрхийг цахилгаан халаагуураар хангах ажлын зохион байгуулж байгааг онцлов.

Ажлын хэсгийн ахлагч Ё.Баатарбилэг Ерөнхийлөгчөөс онц байдал зарлан тэмцэх асуудлаар УИХ-ын дарга М.Энхболдод санал хүргүүлэх тухай албан бичгийг танилцуулав. Хэлэлцэж байгаа асуудалтай холбогдуулж УИХ-ын гишүүн Ё.Баатарбилэг, Д.Хаянхярваа, Д.Тэрбишдагва нар асуулт асууж, санал хэлсэн. Гишүүдийн хувьд агаарын бохирдлыг бууруулах чиглэлээр цаасан дээр байгаа арга хэмжээг бодит амьдралд буулгахын тулд Засгийн газарт тодорхой шийдлүүдийг гаргасан төслийг боловсруулах үүрэг өгөх, хөрөнгө санхүүгийн талаар шийдвэрлэх асуудал байвал УИХ-д яаралтай танилцуулж, бодитой ажил хийх шаардлагатай байгаа талаар санал хэлж байлаа. Мөн хуралдаанаас Агаарын бохирдлыг бууруулах асуудлаар зайлшгүй шаардлагатай хууль, тогтоомжийн төслийг яаралтай боловсруулах, утааг мэдэгдэхүйц бууруулах талаар хэрэгжүүлэх оновчтой, шийдвэртэй арга хэмжээний төлөвлөгөө боловсруулж, түүнд шаардагдах хөрөнгө санхүү, бусад арга хэрэгслийн талаар танилцуулах, Ерөнхийлөгчөөс УИХ-д ирүүлсэн албан тоотод дурдсан онц байдал зарлах асуудлыг судлах саналын хүрээнд судалгаа дүгнэлт хийж, саналаа боловсруулан УИХ-д танилцуулахыг Монгол Улсын Засгийн газар, Орчны бохирдлыг бууруулах үндэсний хороонд үүрэг болголоо.

Онц байдал зарлах саналыг УИХ-аас байгуулагдсан ажлын хэсэг судлахаар боллоо

+ There are no comments

Add yours

You May Also Like: