Хүний эрхийн Үндэсний Байгууллагуудын Дэлхийн Холбооны Товчооны хуралд оролцжээ

ХЭҮБДХ-ны Товчоо нь ХЭҮБДХ-ны Дүрмийн 43 дахь зүйлд зааснаар тус байгууллагын удирдах зөвлөл юм. Тус Товчоо нь ХЭҮБДХ-ны дөрвөн бүсийн сүлжээнээс “А” статус бүхий Хүний эрхийн Үндэсний Байгууллага (ХЭҮБ)-с сонгосон 16 гишүүнээс бүрддэг. Товчооны гишүүд нь Ерөнхий Ассамблейгаас гаргасан шийдвэрийг хэрэгжүүлдэг.

Энэ удаагийн хурлаар тус хорооны одоогийн стратеги төлөвлөгөөний (2017-2019) дагуу хэрэгжүүлсэн үйл ажиллагааны ахиц дэвшлийг үнэлж дүгнэж, Хүний эрхийн үндэсний байгууллагуудад дэмжлэг үзүүлэхэд чиглэсэн 2018 оны үйл ажиллагааны талаар ярилцав. Тус хуралд дөрвөн бүс нутаг буюу Австрали, Чили, Коста Рика, Хорват, Эквадор, Египт, Финлянд, Гүрж, Герман, Энэтхэг, Мексик, Монгол болон Того зэрэг нийт 13 улсаас ирсэн Товчооны гишүүд болон ХЭҮБДХ-ны бүсийн сүлжээ, НҮБ-ын Хүний эрхийн Дээд Комиссарын Газар, НҮБ-ын Хөгжлийн Хөтөлбөрөөс төлөөлөгчид оролцлоо.

Ирэх жилийн Африкт болох олон улсын бага хурлын сэдвийн талаар Товчооны гишүүд өөрсдийн саналыг илэрхийлсэн бөгөөд дийлэнх нь “Хумигдаж буй ардчилсан орон зай: хүний эрхийн хамгаалагчид” гэх сэдвийг санал болгосон.

Түүнчлэн Монгол Улсын Хүний эрхийн Үндэсний Комиссын зүгээс Хүний эрхийн хамгаалагчдын тухай хуулийн төсөл боловсруулаад Монгол Улсын Их Хуралд өргөн барьсныг хуралд оролцогчид ихэд сайшаан хүлээн авч, НҮБ-ын Хүний эрхийн Дээд Комиссарын газар, Хүний эрхийн Үндэсний Байгууллагуудын холбооны зүгээс тус хуулийг батлуулахад нөлөөллийн үйл ажиллагаа явуулахад дэмжлэг үзүүлэхээ илэрхийллээ.