ЦЭЦЭРЛЭГИЙН НАСНЫ ХҮҮХДҮҮДИЙГ ЦАХИМААР БҮРТГЭЖ ЭХЭЛЛЭЭ

ЦЭЦЭРЛЭГИЙН НАСНЫ ХҮҮХДҮҮДИЙГ  ЦАХИМААР БҮРТГЭЖ ЭХЭЛЛЭЭ
 Нийслэлийн хэмжээнд 2017-2018 оны хичээлийн жилд цэцэрлэгт шинээр хамрагдах хүүхдүүдийг бүртгэх цахим бүртгэл өнөөдөр эхэллээ. Цэцэрлэгт шинээр хамрагдах хүүхдүүдийг бүртгүүлэхийн тулд иргэд 2017 оны 07 дугаар сарын 24-нөөс 2017 оны 08 дугаар сарын 24 -ний өдрүүдэд www.tsetserleg.ulaanbaatar.mn хэмээх тусгай цахим хуудат хандаж, хүүхдийнхээ регистрийн дугаарыг оруулах юм. Энэхүү бүртгэл нь Улсын бүртгэлийн газар дахь иргэдийн бүртгэлийн сан дээр тулгуурлан явагдаж байгаа тул тухайн хүүхдийн регистрийн дугаарыг хийхэд аль дүүргийн хэддүгээр цэцэрлэгт хамрагдах тухай мэдээлэл автоматаар гарч ирэх юм.

Мөн эцэг, эхчүүдийн гар утсанд бүртгэлийн тусгай дугаар илгээгдэнэ. Иргэд хүүхдүүдээ тус бүртгэлд хамруулахын тулд дараах нөхцлийг хангсан байх шаардлагатай. Үүнд,

    – Оршин суугаа газартаа бүртгэлтэй, бичиг баримтын зөрчилгүй.
– Цахимаар бүртгүүлэхдээ зөвхөн оршин суугаа хорооны хамран сургах тойргийн цэцэрлэгийг сонгох
– Зорилтот бүлэгт хамаарах иргэд холбогдох материалыг бүрдүүлсэн байх

Анхааруулахад, иргэн та ямар нэг шалтгаанаар нэг дүүргээс өөр дүүрэгт шилжсэн ч шинэ хаяг руугаа шилжилт хөдөлгөөн хийлгээгүй бол таны хүүхэд зөвхөн хуучин хаягийн дагуу цэцэрлэгт хамрагдах боломжтой аж. Иймд та бүхэн хаягийн зөрчилтэй, шилжүүлгээ хийгээгүй байгаа бол зөрчлөө арилгасны дараа л цэцэрлэгийн хүүхдийн бүртгэлд хамрагдах ёстой ажээ.

Харин өмнөх хичээлийн жилд цэцэрлэгт хамрагдсан хүүхдүүдийн бүртгэл 2017 оны 08 дугаар сарын 21-23-ны өдрүүдэд уламжлалт аргаар явагдана.

Д.Думаа

Leave a Reply

Your email address will not be published.