Шинжлэх ухааны байгууллагуудын Үйлдвэрчний эвлэлийн нэгдсэн хороо, ШУА-ийн таван хүрээлэнгийн ажилчид, Баянзүрх дүүргийн 13 дугаар хорооны иргэд оршин суугчид, тухайн газрын сургууль цэцэрлэгийн хүүхдүүдийн эцэг, эхчүүд нэгдэн оршин суух газрын орчны байдлыг эрүүл саруул болтол хугацаагүй суулт зарласан.
Тодруулбал, Таван жилийн өмнө тус газарт зам тавьсан ч 172 дугаар цэцэрлэгийн ар талын шинэ дээд сургуульд шугам татна гээд замыг эвдэлж хаяад дахин засварлаагүй орхижээ. Тиймээс энэ нөхцөл байдалд оршин суугч 100 орчим иргэн, 650 орчим судлаач багш нар, сургууль цэцэрлэгийн хүүхдийн эцэг эхчүүд хамтран “Бид эрүүл аюулгүй орчин амьдрах эрхтэй” хөдөлгөөнийг байгуулж, асуудлыг шийдэх хүртэл хугацаагүй тэмцлийн хэлбэрт шилжиж өнгөрсөн сарын 23-наас эхлэн Хүрээлэнгүүдийн Нэгдсэн нэгдүгээр байрны өмнө суулт зарлаж, иргэдийн гарын үсгийг цуглуулан авто замын хөгжлийн газар, БЗД-ийн засаг дарга нарт шаардлага, Нийслэлийн засаг даргад өргөх бичиг хүргүүлсэн байна. Тэд 400 метр замыг хатуу хучилтаар хучиж, тоос шороогүй цэвэрхэн орчныг бий болгож өгөхийг Дүүрэг болон Нийслэлээс шаардаж байгаа юм.
