Ө.Энхтүвшин: Эх орондоо ирье гэсэн хүсэлтээ 45 орноос 6154 иргэн гаргасан байна

УОК-оос мэдээлэл хийлээ. Энэ үеэр Шадар сайд Ө.Энхтүвшин “Коронавирусийн тархалтын байдал улам хүнд болж байна. Хятад, Солонгос, Япон тархсанаас илүү цар тахал АНУ, Итали, Испани, Герман, Франц гэх мэт Европын улсуудад гарч байна.

Тиймээс манай нөхцөл байдал амаргүй байна гэсэн үг. Аль нэгэн улс “манайд гайгүй, сайжирчихна “гэсэн ойлголт байхгүй. Дэлхий даяарчлагдсан. Бусад улсад дарагдаж байж Монгол Улс хэвийн горимдоо орно. Гадаадад байгаа иргэдээ татан авч байна. Энэ ажилаа үргэлжлүүлээд хийнэ.

Эх орондоо ирье гэсэн хүсэлтээ 45 орноос 6154 иргэн гаргасан байна. Цаашид нэмэгдэх хандлагатай. Ажил орлогогүй, байрнаасаа гарч чадахгүй хашигдсан. Хамгийн хүнд нь Ази хүмүүсийг ялгаварлан гадуурхах хандлага гарч байна. Тиймээс арга буюу эх орон руугаа ирье гэж тэмүүлж байна.

Гэхдээ нислэгийн хэлэлцээртэй орнууд руугаа л ниснэ. Өөр боломж байхгүй. АНУ, Канад, Англи руу нислэг үйлдэх боломжгүй. Зарим орнууд орох ч үгүй, гарах ч үгүй болсон. Тиймээс нислэг үйлдэх боломж хумигдаж байгаа.

Дараагийн нислэгийг дөрөвдүгээр сарын 8-нд БНСУ руу хийнэ. Ойрхон ойрхон нисэх гэхээр боломж бага байна. Нисэх баг иргэдийн нэгэн адил тусгаарлагдаж байгаа. Тиймээс нислэгийн олон баг байхгүй.

УОК-оос ирж буй иргэдийг коронавирусийн шинжилгээ хийлгэсэн байх ёстой гэсэн шаардлага тавьсан. БНСУ-аас өчигдөр ирсэн 270 хүнээс 18 хүн шинжилгээ өгөөгүй. Бусад нь өгсөн байна. Транзитаар ирсэн 10 гаруй оюутан байсан. Нисэх буудлаас гарч ч чадахгүй улсууд байсан. Тэр хүмүүс шинжилгээ хийлгэж чадаагүй.

Өнөөдөр Японоос ирж байгаа иргэд шинжилгээнд хамрагдаагүй. Манай иргэд шинжилгээ өгөх гэж оролдсон ч Японы тал боломжгүй гэдэг хариулт өгсөн. Бид өөрийнхөө оношлуурыг аваачаад онгоцонд орохын өмнө оношилъё гэхэд тухайн орон оношлуурыг хилээрээ оруулахгүй гэсэн. Тэгвэл танайхаас худалдаж аваад оношилъё гэхэд мөн боломжгүй гэсэн. Тиймээс Токиогоос ирсэн нислэг өндөр эрсдэлтэй нислэг болж байна.

56 иргэн АНУ-аас дамжин ирж байгаа. Европын улсуудаас бас дамжин ирж байгаа. Дамжин ирж байгаа, эрсдэл өндөртэй орнуудаас ирж байгаа иргэдээ ХӨСҮТ-д тусгаарлаж, яаралтай шинжилнэ. Гурав хоногийн дараанаас бусад иргэдээ оношилно. Нэг биш нэлээд хэд хэд оношилно. ЭМЯ-наас нэг нэгээр нь байлгах шаардлага тавьсан. Гэхдээ гэр бүлээрээ байж байгаад ирсэн улсууд хамт байх байх. Мөн зайлшгүй асаргаа шаардлагатай иргэд бас бий. Тийм улсууд хамт орж таарна” гэв.