Нэгэн цагт УИХ-ын чуулганы танхимд шударга нийгмийн “зохицуулагч” аятай пээдэлзэж асан ерөнхий прокурор М.Энх-Амгалан нийтэд харагддаг шигээ албан тушаал эрх мэдэлд шуналгүй, төрийн хар хүн биш гэлцдэг нь оргүй зүйл биш аж. Ямартай ч шударга ёс ярих дуртай прокурор асны хүргэчүүдийн хувьд хадмын нөлөөгүй өндөр албан тушаалын томилгоонд орох нь юу л бол.
Үүний баталгаа ч өнөөдөр УИХ-ын Тамгын газарт хийгдсэн удирдлагуудын томилгооноос илтэд харагдав. УИХ-ын Тамгын газрын Хэвлэл мэдээлэл, хууль сурталчлах болон олон нийттэй харилцах асуудал хариуцсан дэд даргаар томилогдсон Эрдэнийн Лхагва нь ерөнхий прокурор асан М.Энх-Амгалангийн том охин Э.Ижилмөрөнгийн нөхөр юм. Тэрбээр хадам эцэг М.Энх-Амгалангаа Ерөнхий прокуророор ажиллаж байх үед буюу 2018 онд анх Оюутолгой ХХК-д зөвлөхөөр томилогдож, улмаар тус компанийн Хамтын ажиллагаа, мэдээлэл, харилцааны газрын Ерөнхий менежер болж дэвшсэн байдаг. Хадам эцгээ Ерөнхий прокуророор ажиллах хугацаанд том хүргэн Э.Лхагва нь ингэж Оюутолгой ХХК-д удирдах албан тушаалтай болсон бол УИХ-ын Тамгын газрын шинэхэн дэд дарга Э.Лхагвын эхнэр Э.Ижилмөрөн нь Талын хишиг пластик ХХК-ийг эзэмшдэг.
М.Энх-Амгалангийн бага охин Э.Уянгын нөхөр О.Хонгор нь төмөр замын тээврийн бизнестэй болж, 265 вагонтой Талын хишиг майнинг ХХК-ийг хадам эцгийнхээ төрсөн дүү М.Бат-Амгалантай хамтарч эзэмшдэг. Тус компани нь “Сахал” Д.Эрдэнэбилэгтэй гэрээлж Дархан төмөрлөгийн үйлдвэр ХК-ийн төмрийн хүдрийг урд хөрш рүү төмөр замаар зөөж, асар их ашиг олсон. Түүнчлэн прокурор М.Энх-Амгалангийн төрсөн дүү М.Бат-Амгалан нь ТЕГ-ын дарга асан Б.Хурц тэргүүтэй хууль хүчний эрх мэдэлтнүүдтэй хамтарч хотын А зэрэглэлд газартай бөгөөд үүний нэг хэсэг нь их хурлын гишүүн Б.Чойжилсүрэнгийн хамаарал бүхий Хүннү-2222 хороолол юм. Ийм газрын эзэмшигчээр прокурор асан М.Энх-Амгалангийн бага хүргэн О.Хонгор байдаг нь тохиолдол гэж хэлэхэд даанч боломжгүй гэдгийг энд дурдах нь зүйтэй байх.
