Ослын улмаас түлэгдсэн хүмүүсийн тав нь маш хүнд байна 

Дүнжингаравын уулзварт гарсан ослын улмаас онцгой байдлын гурван албан хаагч нас барж, 10 гаруй хүн түлэгдсэн. Тэд одоогоор Түлэнхийн төв буюу Гэмтэл согог судлалын үндэсний төвийн салбар эмнэлэгт хэвтэн эмчлүүлж байгаа юм. Түлэгдсэн хүмүүсийн 85-95 хувийн түлэгдэлтэй эмнэлэгт хүргэгдэн эмчлүүлж байгаа бол эрчимт эмчилгээний тасагт эмчлүүлж байгаа 40 орчим насны эрэгтэй нас барсан гэх мэдээлэл олон нийтийн сүлжээнд цацагдсан. 

Энэ талаарх мэдээллийг ГССҮТ-ийн хэвлэл мэдээлэлтэй харилцах хэлтсийн мэргэжилтэн Р.Мөнгөнөөс тодруулахад, “Түлэнхийн төв дээр 14 хүн хүргэгдэж ирснээс таван хүн эрчимт эмчилгээний тасагт, мөн таван хүн энгийн тасагт хэвтэн эмчлүүлж байна. Энгийн тасагт байгаа хүмүүсийн ерөнхий биеийн байдал дунд зэрэг, 2-3 дугаар зэргийн түлэгдэлттэй. Харин маш хүнд байгаа хүмүүсийн биеийн байдал хэвэндээ, хүнд байна. Сошиалд гарч байгаа эрчим эмчилгээний тасагт эмчлүүлж байгаа түлэгдсэн иргэн нас барсан гэдэг ташаа мэдээлэл. Түлэнхийн төв дээр ирсэн иргэдийн ихэнх нь 103-ын яаралтай тусламжаар ирсэн. Зарим иргэд замын унаагаар хүргэгдэж ирсэн учир цаг алдаж тусламж авсан хүн байхгүй. Түлэгдсэн иргэдэд шарх цэвэрлэгээ, боолт, мэс заслын эмчилгээ хийж байна. Түлэгдэлтийн зэрэг, биеийн байдлаас хамаарч хэдий хугацаанд эмчилгээ хийлгэх нь тодорхой болно.