Бутарсан АН нэгдэж, булангаар нэг тарсан фракциуд эвлэрч эхлэв үү…

АН сая нэг юм дотооддоо учраа олж Л.Гантөмөрийг албан ёсны даргаар хүлээн авч, ирэх сонгуульд оролцохоор нэгдэж эхэлсэн талаар ойрын нөхдүүд ярих болж. Ямартаа ч өөрсдөөс нь өөр хэн ч байхгүй мэт дураараа аашилж байсан эрх баригч намынханд ихээхэн ажил удаж байж арай гэж хэлэлцээрт хүрч нэг тийшээ харсан АН-ынхан одоогийн эрх баригчдын хэтийдсэн “пиар”, сөрөг хүчнийхээ намын удирдлагыг онилсон нүүр, нүдгүй сохор дайралтын эсрэг АН-ын гишүүд дахин нэгдэж, нягтарч эхэлсэн нь маш олзуурхууштай үйлдэл мөн байж таарна. Эх сурвалж, “АН-ын “МонДе” фракц өнгөрсөн бямба гарагт “Гүн Галуутай”-д цуглаж, 2024 оны сонгуулийнхаа стратегийг ярилцсан. Ингэснээр Л.Гантөмөрийг намын даргаас огцруулах тухай дэл сул яриаг нэг мөсөн хааж, намын даргатайгаа нэг баг болж, дэмжиж ажиллахаар болцгоосон. “МонДе” фракцид АН-ын энэ цаг үеийн нүүр царай болсон голлох лидерүүд буюу УИХ-ын гишүүн Б.Пүрэвдорж, Ж.Батсуурь, УИХ-ын гишүүн, Хууль зүйн сайд асан Х.Тэмүүжин, хуульч Г.Эрдэнбат, эдийн засагч Р.Даваадорж, Нийслэлийн АЗХ-ны тэргүүн н.Өлзийбаяр нар багтдаг, ҮБХ дотроо нэлээд томд орох фракци” гэдэг мэдээллийг өгсөн юм. Түүнчлэн “Гүн Галуутай”-д болсон энэ уулзалтын дараа АН-ын “Нэг Монгол” хөдөлгөөнийнхөн бас “Асем Вилла”-д цуглан хуралдаж, Л.Гантөмөрийг намын даргаа хэмээн дэмжиж, нэг баг болж ажиллахаар тогтсон гэнэ. Хамгийн гол нь Л.Гантөмөр рүү чиглүүлсэн эрх баригч намын зорилтот пиар зорилгодоо хүрэлгүй унаж, эсрэгээрээ тус тусдаа үйл ажиллагаа явуулж ирсэн АН-ын фракциудыг эргүүлэн нэгтгэж эхэлсэнийг ийнхүү харуулж байна хэмээн их сурвалжийн өнцөг содон байв!!! Магадгүй өмнө нэг удаа намын даргын сонгуульд ялалт байгуулсан ч С.Эрдэнээс тамгаа авч чадалгүй буцсан М.Тулгатын тэргүүлдэг “Од” фракци, Да.Ганболд, Б.Гарамгайбаатар нарын МҮДН, УИХ-ын гишүүн Д.Ганбатын “Хийморь” зэрэг АН дотор хүч, нөлөөтэй байгаа фракциуд бүгд ирэх 2024 оны сонгуулийг кампанит ажлыг Л.Гантөмөр удирдах ёстой гэдэг дээр санал нэгдсэн нь их мөнгө, их хүчийн эсрэг нэгдэж гарцаа зөв нээж зүтгэж чадваас ирэх 2024 оны Их хурлын сонгуульд иргэдийн итгэлийг ихээр авч чадах боломж гэдэгтэй санал зөрөх хүнгүй байгаагийнх биз. Ямартай ч 2020 оны УИХ-ын сонгуулиас хойш сөрөг нам буюу МАН-ын хамаарал бүхий ханцуй суйлсан наймаанд нидрүүлж, албан ёсны даргагүй АН ийнхүү сэргэхийн эхлэл тавигдаж. Мэдээж хожуу ч гэсэн ухаарал хамгийн чухал. Харин ухаарлаа урвалтаар солихгүй нэгдэж чадвал өнөө цагийн АН-д эх орныхоо хөгжилд хувь нэмрээ оруулах багийн хүч бий хэмээн монголчууд итгэхийн хүсч буй. Тиймээ, АН-д өнөөдөр эвлэрэл хэрэгтэй болохоос эвдрэл хэрэггүй. АН-ын эвдрэл МАН-д ашигтай болохоос маниуст ашиггүй. Тиймээс нэгэн цагт эвлэж байсан шигээ энэ цагт нэгдэх нь өнөөдрийн АН-д маш чухал. Тэднийг нэгдэж чадвал эргэлзээ үгүй монголчууд нэгдэх нь дамжиггүй…