ЭМЯ: Томуугийн халдварын оргил үед хүүхдээ олон нийтийн газраар авч явахгүй байхыг зөвлөж байна

Томуугийн тархалт 0-3 насныхны дунд их тохиолдож байгааг Эрүүл мэндийн яамнаас томуу, томуу төст өвчний талаар мэдээлэл хийх үеэр хэллээ.

ХӨСҮТ-ийн дэд захирал Ц.Чинбаяр “Хүүхэд нь өндөр халуурч байгаа тохиолдолд заавал эмчийн зөвлөгөөний дагуу асаргаа сувилгаа, эмчилгээг хийх хэрэгтэй. Өнөөдөр ХӨСҮТ-д 198 хүүхэд томуу, томуу төст өвчний улмаас хэвтэн эмчлүүлж байгаагаас 20 орчим нь уушгины хатгаагаар хүндэрсэн.

Өнөөдрийн байдлаар ХӨСҮТ-ийн Эрчимт эмчилгээний тасагт есөн хүүхэд уушгины хатгаа, амьсгалын дутагдал, амьсгалын замын бачуурал оноштойгоор хэвтэн эмчлэгдэж байна.

Тийм учраас хүүхдээ олон нийтийн газраар авч явахгүй байх. 0-5 насны хүүхдүүддээ томуугийн вакцин хийлгэхийг зөвлөж байна” гэлээ.