Б.Оюутболд: Сүхбаатарын талбай дээр өдөрт 50-60 иргэн хонож байна

Нийслэлийн удирдах ажилтнуудын шуурхай зөвлөгөөн өнөөдөр боллоо.

Энэ үеэр Улаанбаатарт гарсан хэрэг, зөрчлийн талаар холбогдох албаны хүн мэдээлэл өглөө.

Нийслэлийн Цагдаагийн удирдах газрын дэд бөгөөд Нийтийн хэв журам хамгаалах газрын дарга, хурандаа Б.Оюутболд “Цагдаагийн байгууллагад 14 хоногийн хугацаанд 15,559 гомдол, мэдээлэл ирсэн нь 74 нэгжээр өссөн үзүүлэлт.

Гэмт хэргийн 2,657 гомдол, мэдээлэл бүртгэгдсэн нь өмнөх 14 хоногтой харьцуулахад 12.1 хувиар буурсан.

Хүний амьд явах эрхийн эсрэг гэмт хэрэг өссөн бол бусад гэмт хэргийн тухайд буурсан үзүүлэлттэй байна. Гэр бүлийн хүчирхийллийн дуудлага мэдээлэл мөн багассан” гэлээ.

Тэрбээр мөн жагсаалтай холбоотойгоор Сүхбаатарын талбай дээр өдөрт 50-60 иргэн хонож байгааг танилцуулав.

Нийслэлийн Эрүүл мэндийн газрын дарга Б.Бямбадорж “Томуугийн өвчлөл нийт амбулаторийн үзлэгийн 10-12 хувийг эзэлж байна. Ковид хоёр оронтой тоонд орсон.

Жагсаалтай холбоотойгоор нэг ээлжид гурван баг ажиллаж байна. Өдрийн цагаар дуудлагаар, шөнийн цагт хоёр цаг тутамд үзлэг хийж байгаа. Мөн давхардсан тоогоор 340 хүнд үзлэг хийгээд байна” гэв.