Япон улсаас Монголд зүрх судасны мэс заслын төв байгуулж өгнө

Монгол-Японы хооронд дипломат харилцаа тогтоосны 50 жилийн ойг тохиолдуулан Япон Улсын хамгийн том хувийн эмнэлгүүдийг нэгтгэсэн “Токушүкай медикал групп”-ийн ерөнхийлөгч Шиничи Хигашиүэ манай улсад Зүрх судасны мэс заслын төв байгуулахаар болсон талаараа хэллээ.

Энэ төвийг байгуулахдаа дан ганц эмнэлгийн барилга бариад зогсохгүй хүний нөөцийг хөгжүүлж, тоног төхөөрөмжид ч хөрөнгө оруулахаар төлөвлөж байгаагаа тэрбээр онцлов.

“Токушүкай медикал групп”-ийн ерөнхийлөгч Шиничи Хигашиүэ нь улсдаа зүрх судасны чиглэлээр хамгийн олон удаа амжилттай мэс засал хийсэн эмч нарын нэг юм байна.

Токүшүкай медикад группийн Ерөнхийлөгч Шиничи Хигашиүэ:

-Манай айлчлалын баг Монголд ирээд нийт дөрвөн эмнэлгээр зочилж, танилцсан бөгөөд тэдгээр эмнэлэгт тодорхой хэмжээний тусламж үзүүлэх бодолтой ирсэн. Одоогоор Зүрх судасны мэс заслын төв байгуулах эмнэлгээ сонгоогүй байгаа. Токүшүкай группийн үүсгэн байгуулагч анх Японы хамгийн сүүлийн үеийн, дэлхийд тэргүүлэх эмнэлзүйн аргыг дэлхий дахинаа түгээхийг зорьж уг группийг байгуулсан. Түүний энэхүү бодлогыг би уламжлан авч, үргэлжлүүлэн хэрэгжүүлж байна. Зөвхөн барилга байгууламж бариад зогсохгүй хүний нөөцийг хөгжүүлж, тоног төхөөрөмжийн тусламж бас үзүүлэх юм.

-Ямар шалтгаанаар энэхүү төвийг байгуулж байгаа вэ?

-Би өөрөө Япон Улсдаа хамгийн их зүрх судасны хагалгаа хийсэн эмч нарын нэг. Иймд зүрх судасны өвчний салбар надад ойр байдаг. Түүнчлэн манай групп зүрх судас болон дотрын мэс заслаараа алдартай нь хүний нөөцийг хөгжүүлэхэд давуу тал олгож байна.

-Хэчнээн хэмжээний хөрөнгө оруулалт хийх вэ?

-Хөрөнгө оруулалтын хэмжээг би яг одоо хэлэх боломжгүй. Үүнийг Токүшүкай группийн ТУЗ-ийн хурлаар хэлэлцэж, шийдвэрлээд бодитой дүнг мэдэгдэх болно. Миний бодлоор 500-600 сая иен байх болов уу.

-Цаашдаа өөр төрлийн төв байгуулах уу?

-Манай эмнэлэг дотор эрхтэн, дурангийн хагалгаагаараа маш алдартай. Тиймээс тоног төхөөрөмжөөс гадна сургалт, судалгааны ажил дээр туслах боломжтой гэв.