Телевизийн холбоо нэр дэвшигчдийг халз мэтгэлцэхийг уриаллаа

Өнгөрсөн нэг сарын турш Ерөнхийлөгчид нэр дэвшигчээ дэвшүүлсэн гурван намын удирдлагууд нэр дэвшигчдийн дунд халз мэтгэлцээн зохион байгуулах асуудлаар уулзаж, гурван телевизээр, гурван удаагийн мэтгэлцээн зохион байгуулах нь зүйтэй гэсэн шийдэлд хүрсэн. Харамсалтай нь АН-ын сонгуулийн штабаас мэтгэлцээн хийх боломжгүй хэмээн хүлээн аваагүйгээс гадна мэтгэлцээн хийвэл зөвхөн өөрсдийн сонгосон телевизээр нэг удаа мэтгэлцэх шаардлага тавьсан юм.

 Телевизүүдийн холбооны ерөнхийлөгч А.Энхзул “Ерөнхийлөгчийн сонгууль бол хэн улс орныг удирдах вэ гэдэг ард түмний чухал сонголт учир ганцхан МҮОНРТ-ээр бус, арилжааны буюу Монголын телевизүүдийн холбооны 16 телевизээр явуулахыг хүсч байна” гэв.

Тус холбооноос хоёр удаагийн халз мэтгэлцээнийг Соёлын төв өргөөнд зохион байгуулахаар төлөвлөжээ.

 Мэтгэлцээнийг энэ долоо хоногийн бямба гаригийн 20.00 цагт, дараагийн мэтгэлцээнийг энэ сарын 17-ны бямба гаригт хийхээр төлөвлөжээ. Ийнхүү тэд халз мэтгэлцээн зохион байгуулах саналаа гурван намд илгээсэн байна. МАН, МАХН уг саналыг бүрэн дүүрэн дэмжсэн бол АН-аас өнөөг болтол тодорхой хариу ирүүлээгүй байгаа аж. Тиймээс Телевизүүдийн холбооноос зохион байгуулж байгаа мэтгэлцээн бол бүх ард түмний хүсэлт, дуудлага учраас АН-аас мэтгэлцээнд оролцох хариуг ирүүлнэ гэдэгт итгэлтэй байгаагаа онцлов.

Дашрамд дурьдахад мэтгэлцээнийг хөтлөх хөтлөгчөөр Ikon.mn сайтаар санал асуулга явуулсны үр дүнд хамгийн өндөр оноо авсан “De facto” Д.Жаргалсайхан, Монгол HD телевизийн Лхагва, Форум нэвтрүүлгийн хөтлөгч Д.Энхбатад санал тавьж, хөтлүүлэхээр төлөвлөжээ. Монголын телевизүүдийн холбоо зохион байгуулахаар болсон нь халз мэтгэлзээнийг 16 телевизээр шууд дамжуулах ажээ.

 Г.Гэрлээ