Шүүхийн шийдвэр гүйцэтгэх ерөнхий газрын Хорихоос өөр төрлийн ял эдлүүлэх алба Монгол Улсын боловсролын их сургуулийн харьяа Сэтгэл зүйн үйлчилгээний төвтэй хамтран “Сургагч багш” бэлтгэх, мэргэшүүлэх, эрх олгох сургалтыг зохион байгуулж байна. Уг сургалтад нийслэл дэх ШШГГ-ын Хорихоос өөр төрлийн ял эдлүүлэх ажиллагаа хариуцсан шийдвэр гүйцэтгэгчид болон Баривчлах төв, Согтуурах, мансуурах донтой өвчтэй этгээдийг албадан эмчлэх, албадан хөдөлмөр хийлгэх газрын холбогдох албан хаагчид хамрагдаж байгаа аж.
“Сургагч багш” бэлтгэх сургалт нийт дөрвөн хоног зохион байгуулагдана. МУБИС-ийн харьяа Сэтгэл зүйн үйлчилгээний төвөөс мэргэшүүлэх сургалтын хүрээнд алба хаагчдад заах арга зүй, бие хүний сэтгэл зүйн болон насны онцлог, хүчирхийлэл үйлдэгчийн зан үйлийг хэрхэн зохицуулах зэрэг сэдвээр 32 цаг буюу 2 багц цагийн сургалт явуулж, “Сургагч багш”-ийн гэрчилгээ олгож буйгаараа давуу талтай юм.
Мөн сургалтад хамрагдсан алба хаагчид энэхүү сургалтад хамрагдсанаар зан үйлээ засах албадлагын арга хэмжээ авагдсан этгээдийн зан үйлд нөлөөлөх сургалт зохион байгуулах эрхтэй болж буйгаараа онцлогтой хэмээн Шүүхийн шийдвэр гүйцэтгэх ерөнхий газрын хэвлэлийн төлөөлөгч өгүүллээ.
С.Санчир
