“Хэнд ч эрүү шүүлт тулгах, доромжлон харьцах ёсгүй”

Эрх чөлөө хөдөлгөөний ерөнхий зохицуулагч М.Чимэддорж “Эрх чөлөө хөдөлгөөний зүгээс эрүүдэн шүүсэн явдлыг хүлээн зөвшөөрөхгүй гэдгээ нэн түрүүнд илэрхийлье. Манай хөдөлгөөнийхөн Монгол Улсад эрх зүйт нийгмийг цогцлоохын төлөө сайн дураараа нэгдсэн. Иймд бид эрүүдэн шүүсэнтэй холбогдуулан Монгол Улсын Ерөнхий сайдад шаардлага хүргүүлнэ.

Хүний эрхийн түгээмэл тунхаглалын тавдугаар зүйлд “Хэнд ч эрүү шүүлт тулгах, хүний ёсноос гадуур буюу нэр төрийг нь доромжлон харьцах ёсгүй” гэж заасан. Мөн Эрүүгийн хянан шийдвэрлэх тухай хуулийн 1.9 дүгээр зүйлд “эрүүгийн хянан шийдвэрлэх ажиллагаанд оролцогчид эрүү шүүлт тулгаж, хүнлэг бус харьцаж нэр төрийг нь доромжлохыг хориглоно” гэж заасан бөгөөд эдгээр заалтууд нь ардчилсан Монгол Улсад хэрэгжихгүй байна. С.Зориг агсны амийг хөнөөсөн гэмт хэргийг шалгах явцад эрүүдэн шүүсэн үйл ажиллагаанд оролцсон хүн бүрийг шалгаж, хуулийн хариуцлага хүлээлгэх ёстой гэж үзэж байна. Мөн 2001 оноос хойш Хүний эрхийн дэд хороонд ирүүлсэн эрүү шүүлттэй холбоотой гомдлуудад Засгийн газраас авч хэрэгжүүлсэн арга хэмжээний талаарх мэдээллийг олон нийтэд ил болгохыг шаардаж байна” гэлээ.