Автомашинаа халаах зорилгоор асаалттай орхисноор хулгайд алджээ

Тээврийн хэрэгслээ халаах зорилгоор асаалттай хараа хяналтгүй орхисны улмаас автомашинаа алдсан дуудлага мэдээлэл бүртгэгджээ. Тодруулбал, Баянзүрх дүүрэг дэх цагдаагийн хоёрдугаар хэлтэст нэгдүгээр сарын 10-ны 03:00 цагийн орчимд Сонгинохайрхан дүүргийн зургаадугаар хороонд оршин суух эрэгтэй “Ц”-нь Баянзүрх дүүргийн гуравдугаар хороо Сансарын тунель дээр караокед үйлчлүүлж байх хугацаандаа өөрийн эзэмшлийн автомашинаа халаах зорилготой нормалдаж асаалттай хараа хяналтгүй үлдээсэн үед нь 27 настай эрэгтэй У нь унаж зугтсан хэрэг гарсан байна.

Автомашин хулгайлсан гэх эрэгтэй 27 настай “У”  нь согтуугаар унаж зугтаасныг илрүүлэн эрүүлжүүлэх саатуулах арга хэмжээг авч шалгалтын ажиллагаа явуулж эхэлжээ.

СЭРЭМЖЛҮҮЛЭГ: Иймд иргэд тээврийн хэрэгслээ халаахдаа хараа хяналтгүй орхихгүй байхыг цагдаагийн байгууллагаас анхааруулж байна. Мөн иргэд өглөө эрт хашаа болон орон сууцны гадна өөрийн автомашинаа хараа хяналтгүй асаалттай байлгаж байгаа нь дээрх гэмт хэргийн хохирогч болсоор байгаа юм. Түүнчлэн автомашиндаа гар цүнх болон эд зүйлсээ үлдээхгүй байхыг цагдаагийн байгууллагаас зөвлөж байна.