Хар тамхи хэрэглэсэн таван сурагчийг баривчилжээ

Өнөөдрийн байдлаар Монгол Улсад хар тамхи хэрэглэгчдийн тоо 75 мянгад хүрч, хэдийнэ хэрэглэгч орон болсон гэх судалгааг НҮБ-аас гаргажээ. Энэ нь дэлхий нийтэд манай улс хар тамхины өндөр хэрэглээтэй орон гэдгээрээ танигдаж эхэлсэн гэсэн үг юм.

Сүүлийн саруудад өсвөр насны хүүхэд болон сурагчид хар тамхи, мансууруулах бодис хэрэглэх болсон талаар хэвлэлийнхэн онцлон бичиж эхлээд байна. 2018 оны эхний есөн сарын байдлаар хар тамхи, мансууруулах төрлийн бодис хэрэглэсэн, худалдсан, тээвэрлэсэн, хууль бусаар хадгалсан гэх 131 хэрэгт 237 хүн холбогдон шалгагдаж байна. Албаныхан эмэгтэйчүүд, хүүхдүүдийн хувьд хар тамхи, мансууруулах бодисын хэрэглээ нэмэгдэх хандлагатай байгааг сануулсаар буй юм.

Энэ сарын 21-ний өдөр ЦЕГ-ын Хар тамхитай тэмцэх тасгийн байнгын бүртгэлд байдаг, олон жил хар тамхи хэрэглэсэн хоёр залуу амиа хорлосон хэрэг гарчээ. Энэ нь хар тамхи удаан хэрэглэсэн иргэд сүүлийн шатандаа орж, биеэ удирдах, үг яриагаа хянах боломжгүй болж, сүүлдээ сэтгэл санааны гүн хямралд орсны илрэл аж. Хар тамхийг хэрэглэж эхэлсэн  иргэд гарах магадлал гарын таван хуруунд ч хүрэхгүй хувьтай байдаг нь хамгийн аюултай юм.

Өнгөрсөн есдүгээр сард л гэхэд өсвөр насны хүүхэд холбогдсон хар тамхины хэрэг хоёр ч удаа бүртгэгджээ. Мөн Баянгол дүүргийн зургадугаар хорооны нутаг дэвсгэрт аравдугаар сарын 10-ны өдөр 17, 18 настай хоёр эрэгтэй мансууруулах төрлийн бодис хэрэглэж байсныг үйлдэл дээр нь илрүүлэн саатуулж, хүүхдүүдээс биологийн шинжилгээ авахад хар тамхины төрлийн бодис хэрэглэсэн нь тогтоогджээ.

Түүнчлэн ерөнхий боловсролын сургуулийн таван сурагч хар тамхины хэрэгт холбогдсон бөгөөд тэдний хамгийн бага нь 13 настай дѳрвѳн хүүхэд байсан нь хар тамхины аюул бидэнд хэр ойрхон ирснийг харуулсан томоохон жишээ юм. Хар тамхи хэрэглэж байгаад баригдсан 13 настай дѳрвѳн хүүхдийн хоёр нь эрэгтэй, хоёр нь эмэгтэй аж.

Ѳсвѳр насны хүүхдүүдийн дийлэнх нь найз нөхдийнхөө хамт хар тамхи хэрэглэж, улмаар хэрэгт холбогдсон байдаг. Тэд бие биедээ сонирхуулж, нэг нэгнээ уруу татах, даган дуурайх хэлбэрээр татагдан орсон байдаг нь мөрдөн шалгах ажиллагааны явцад ил болдог байна.

Өсвөр насны хүүхдийн хар тамхи, мансууруулах бодисын хэрэглээ сурган хүмүүжүүлэгч багш, эцэг эхчүүдийн толгойны өвчин болж эхэлжээ. Эцэг эхчүүд дунд сургуулийн орчинд хэрхэн хүүхдээ хар тамхины хэрэглээнд ойртуулахгүй, хэрэглүүлэхгүй байх талаар зөвлөгөө авч, мэргэжилтнүүдэд хандаж эхлээд байгаа аж. Ѳчигдѳр орой ЦЕГ-ын Хар тамхитай тэмцэх тасгаас гүйцэтгэх ажиллагаа явуулж, хар тамхи хэрэглэж байсан залуусын бүлэглэлийг илрүүлэн цагдан хорьсон байна.