Нийт нутгийн 76.8 хувь цөлжилтөд нэрвэгджээ

УИХ-ын чуулганы өнөөдрийн хуралдаанаар Д.Тогтохсүрэн нарын гишүүдийн өргөн мэдүүлсэн Ус цаг уур, орчны хяналт шинжилгээний тухай хуульд өөрчлөлт оруулах тухай хуулийн төслийг хэлэлцэж, баталлаа.

Орон нутгийн түвшинд төрийн үйлчилгээний үр ашиг, чанар, хүртээмжийг нэмэгдүүлэх, чиг үүрэг, эрх мэдлийг оновчтой хуваарилах шаардлага тулгарч буй юм. Иймд  Ус, цаг уур, орчны хяналт шинжилгээний улсын сүлжээний нэгжийн албан хаагчийг томилохдоо тухайн орон нутгийн Засаг дарга, тус нэгжийн даргатай зөвшилцөн томилохоор хуулийн төсөлд тусгажээ.

Монгол Улсын нийт газар нутгийн 76.8 хувь нь цөлжилтөд нэрвэгдэж, 774 булаг шанд, 263 гол горхи ширгэсэн гэдгийг УИХ-ын гишүүд хэлэлцүүлгийн үеэр онцолж байв. Мөн Засгийн газар, холбогдох байгууллагуудын зүгээс цаг агаарын дулаарал, цөлжилттэй тэмцэх чиглэлд анхаарах шаардлагатай гэдгийг Б.Бат-Эрдэнэ гишүүн хэллээ. Санал хураалт явуулахад хуралдаанд оролцсон гишүүдийн олонхи хуулийн төслийг батлахыг дэмжлээ.